之前講過，睇長綫（十年），其實都應該揀H Plan，唔好因爲P Plan可能幾個月低D就忽略左可能挨之後十幾年貴息嘅問題。但P Cap其實係另一件事情，如果同一個H條件，多一個條款保障，緊係好D，呢個係By Definition，不用討論。
講緊係H條件唔一樣，但又差唔到好多（如果差好多，例如而家有H Plan係+0.6%，其他普遍要+1.5%，就一定H Plan，賺長期嘛），用少少差別，換一個P Cap，值唔值得？
例如，如果無Cap，可以做到H+1.35%，如果有，就H+1.55%或者P-2%。你會揀邊個？
如果短視（好多客戶同理財顧問都係咁），今日H係3.3%，+1.35%就係4.65%，P如果係5.825%，減2%即係3.825%，緊係P Plan好D。
但其實，加息其實都係呢一年嘅事，一年前（2022年3月），H只係大約0.3%，而P都要5%（P維持5%好多年），H+1.55% = 1.85%， P-2%就是3%，P Cap基本無用。
有D人話，加一個P Cap，其實就係買一個保險，如果差0.2%，值唔值，就好似買保險一樣，看個人價值，但起碼是一個合理條件。
呢個就係我今日想講，其中最大嘅問題係，我地叫P Cap，其實根本唔係Cap，因爲P一樣可以升。一個真正嘅Cap，應該係一個固定利率，例如5%，如果H Plan低過5%，就用H計，如果高過5%，就最高5%，借貸人就有保障，唔怕失預算。
但可惜，市場上無可能有呢D計劃，因爲對銀行風險太大。而如果長期Fixed一個利率，市場要求嘅水平又會遠遠高過H Plan，早10年前樓宇按揭試過，根本無人揀。（H Plan 2厘唔使，但Fixed Rate要差不多4%，你自己話。）
如果H上升，“P Cap”可以保護到你幾多？首先要知道，咩野係H？
Hong Kong InterBank Offer Rate，銀行同業拆息，除左3大銀行出名自己都夠存款，一般唔使向市場攞資金外，其他銀行要做生意，就要响呢個同業市場借入資金。換言之，H，就係銀行“入貨”嘅成本，而加果個Spread，就係銀行嘅利潤。
所以，H Plan，銀行係一個好簡單嘅“Mark Up Pricing”，Mark高Mark低，都一定賺錢，所以可以Mark得好“實價”。反而如果P Plan，因爲P唔係市場利率，銀行都驚來貨價唔穩定，就算H跌，都傾向維持P响高位，呢個亦解析到點解長綫，H Plan都優惠過P Plan。
而如果H 升（好似呢一年），如果係1、2個月，銀行都唔一定即刻加P，因爲P本身都預高左，所以就俾好多人錯覺，以爲真係有一個Cap。但如果H持續升，銀行來貨貴曬，唔通真係要蝕本？咪一樣加P。總之銀行唔會做蝕本生意。
可以咁諗，長期而言（有時候蝕1、2個月都好，但做生意穩定性更重要，唔一定會即時加減），P Plan嘅實際利率，無可能低過H，甚至唔可能低過H加某一個Spread，因爲如果咁樣，你仲驚，銀行長期蝕本，好快會執笠。如果你而家Lock左最優惠嘅H+0.6%，P Cap俾到你最大嘅保護，咪就係呢0.6%，但如果你要P Cap，就要起碼加1.3-1.5%。你自己話？
Comments