筆者自1999年畢業後翻香港，第一份工作已經係做保險，响一間小型保險經紀做銷售中介人。但係同好多同行唔同，我比較抗拒做Warm Market，唯有日日Cold Call，由初頭比人勁Cut線，到後來就勁比人Cut線，不過終於有一DD人應承出黎，大概做左半年，就可以維持一個星期Cold Call到8-10個Appointment。今日睇翻，一個禮拜見10個新客，一個月都只係Close到3、4張單，自己都覺得自己渣。不過無法，凡事總有一個過程。

 

讀者如果係同行就知道，跑幾年數後，就開始心思思帶人Build Team。不過筆者其實好蠢，今日捻翻，梗係捽D靚仔靚妹約D姨媽姑姐出黎，但筆者就是覺得做生意最好唔好賺自己人既錢，要賺就賺街外錢（我知道，完全唔Logic），所以教靚仔靚妹打Cold Call，後來仲出錢請TM打比條Team見。當然，就算有客派，見Cold Call同見Warm Market是完全不同層次既技術，大家不斷從錯誤中學習，日日Case Study。

 

當年，Broker公司的支援非常有限，乜野都係自己做，登廣告請人，Interview，Training，請TM，都一腳踢。今日睇翻，好多經營一間Broker的事情，都是這些年學翻黎嘅，辛苦，總有得著。然後2012年，一D機緣，第一次成為公司嘅持牌CE，開始做公司管理嘅事情，2014年，加入一間中資券商，幫忙成立保險業務部門，就開始摸索學習從一條Team嘅管理變做成間公司嘅領頭人。

 

後來，希望再有一個突破，就出左黎搞公司，而家雖然都係公司RO，不過公司就自己有份。亦同好多行家，有好多合作、結盟。因為做左成二十幾年，覺得個個唔係Recruit人，就佢比人Recruit，好悶啊。講真，有幾多Team Head食人Override，真係教到人野？？搞到我地呢行，好似做傳銷，唔係比唔比到野人，係睇昆唔昆到人做自己下線，比自己食Override，然後唔做都有錢分。究竟我們行業可唔可以有第二種架構？呢個就係我同一班同路人呢幾年一直捻、一直嘗試實踐嘅理想。

 

上年疫情，大陸人買保險嘅生意基本係零，收入受影響，不過之前揾落，都未算“連樓都供唔起”（聽聞呢個真係一些同行的苦況），但錢一回事，無乜野做，人悶都係一個大問題。有一次，有個保險公司嘅RM，勸（或者係渡！？）我試下做翻跑數。於是請左個TM，點知一個星期見左2個，都簽到一個，雖然係細單，但意義重大，證明我寶刀未老。

 

人年紀大，竟然有一個衝動，希望可以把自己心裡面嘅一些感覺，同這些年得到嘅體會，同人分享一下。於是，有左呢個Page。