一般而言，如果已經發現有健康問題，想買保險，保險公司都唔會接受，拒保，或者延期（其實只係禮貌D拒保），最起碼會加exclusion，講明唔保已經有事果樣野或者果個部位，或者加保費。例如附圖係關於結腸息肉（唔好問我係乜，我又唔係醫生），某保險公司内部嘅核保政策。通常，如果係無害嘅異常狀況（例如良性腫瘤），都可以用Exclusion解決，但如果是嚴重或者不確定，為左避免風險，保險公司都會乾脆拒保。
傳統上，醫療保險都需要核保，就係考慮下受保人嘅情況，決定保唔保。如果有嚴重D嘅狀況，真係買唔到醫療保險㗎。但係，市場上就有一款（慣常做法，唔開名，又唔係幫果間公司賣廣告，純為讀者提供市場資訊而已），唔需要通過核保嘅醫療保險，即係申請嘅時候，連健康問卷都唔使做，保險公司亦根本唔會考慮受保人健康狀況，都一定承保。理論上，末期癌症病人，都可以買到。
當然，計劃亦唔係已經有病都可以全數賠償，如果咁都賠得，蝕死保險公司。計劃條款講明，買嘅時候唔睇病歷，但索賠時就要睇，如果保險公司發現（今日，醫療系統聯網，都無乜可以瞞到保險公司），果個病係買保險之前已經有，如果係普通版果款，就唔會賠償，如果係進階果兩個版本，响270日後開始，首兩年就賠每年最多港幣18,000，然後提升到每年港幣36,000。
唔好睇小呢幾萬蚊。我地健康，就覺得買保險都净係賠得幾萬蚊，有鬼用咩。但係如果已經有病嘅人，基本都一定賠到呢幾萬。例如男性40歲，買進階亞洲版港幣4萬墊底費果款，保費都係33,449。係，每一年頭4萬要自己比，但如果自己個病都知道一年要洗10萬8萬，咁頭2年就肯定賠到果18,000，變相净付出先係果15,500，就買到計劃嘅其他賠償同權益。
要知道其他非已存在狀況係全數賠償㗎，無事就緊係蝕（買保險係咁架啦），如果有事，而家入一入私家醫院，都肯定唔只呢15,500啦。就算唔入醫院，普通傷風感冒都總有機會，門診都係全數賠付，中醫都700蚊一次，莫講一年仲有2,400蚊健康檢查，打疫苗都可以報2,400。計返條數，真係好抵。
第三年開始，已存在疾病賠償仲提升到36,000，當年（43歲）保費都係37,847，接近唔洗錢買到果計劃。已經有病嘅人，特別擔心會再有其他病況，好願意去買一個保障。而呢班基本人又無其他公司可以買到保險（甚至連人壽危疾都可能買唔到），值得大家留意下呢D生意機會。
Comments