近幾年，好多同行都喜歡賣投資相連計劃，主要係賣計劃裏面嘅派息基金。因為呢D派息基金，每一年都可以派出4-6%，仲要係個個月派。D客心理就係咁，每一個月見到銀行有利息收到，真係落左袋，感覺實在好多，如果唔係，賺幾多都好，未實現，都只係紙上富貴而已。
其中市場上最流行果隻，我都唔開名，實際上過去都做得唔錯：2019年19.65%；2020年21.90%；2021年11.63%，其中仲要有4.20%係每月派出黎嘅利息，真係Feel到。就算2018年，有少少蝕，都係跌4.69%，拉勻其實小意思。不過。。。投資呢家野，賺錢個年，當然賺錢，但蝕錢果年，咪蝕錢囉。廢話，但又真係投資嘅真理– 唔好以爲之前賺，之後就會繼續賺，或者監管最鍾意要我地講果句：過往表現不代表將來。
要分析未來，我地就要深入理解隻基金究竟係投資咩野，之前好景，係唔係未來都會好景。其實呢隻派息基金，之所以可以派到成5%，係因爲佢背後投資左好多”高收益債券“。咩野係高收益債券，行業内一般定義為評級機構（S&P）評為BB+或以下嘅公司債券，有另一個名，叫非投資級別，因爲BBB-或以上嘅，我地叫投資級別，即係穩陣D，值得投資，咁以下嘅，咪叫非投資級別，簡單。
不過，呢類債券，仲有另一個更直接嘅名，就係垃圾債券（Junk Bond），因爲風險真係高好多，隨時有機會變爲毫無價值嘅垃圾。咁又有問題啦，點解垃圾，又有人會買？因爲如果整體經濟環境好，間公司話就話隨時變垃圾，但實際上真係無變，咁隻債券D利息又真係高過人（如果唔係，吸引唔到投資者）。呢個就係過去幾年嘅情況，所以隻基金咪又派息，有賺價囉。
問題係，最近情況有變，加息就唔講，更大嘅問題係俄羅斯被制裁，好有機會（有幾隻其實已經）違約，因爲根本無辦法籌措美金去還息還錢。我最近聽過有人駁我，話呢隻基金都無買俄羅斯債務，關咩野事？香港夠無入口俄羅斯石油啦，點解油站D油又加價？環球經濟，係一環扣一環，部分金融機構，俄羅斯債券蝕左錢，要補倉，就要賣其他債券，尤其係Rating低果D。而其他投資呢D垃圾債券嘅基金，預期呢個情況，就會搶住沽貨，如果咁就會令到呢個市場大跌。事實上，呢隻基金2022年到3月24日爲止，都跌左7.64%，係有少少𤓓味啦。
行文呢日，好彩，俄羅斯同垃圾債券市場仲未爆。係唔係會出事，無人知。但問題係呢個風頭火勢，仲叫個客去買呢D“高收益”債券，係唔識咩野叫“高收益債券”（我相信保險公司Agent，可能真係唔知，公司話賣咩，咪賣咩囉），定故意懶理客戶死活（我難以相信，私人銀行都仲Sell緊）？
Comments