呢個星期咁啱好幾個人都同我討論D Plan嘅IRR，有客有同行。
其實，我習慣唔用IRR去Sell Plan，因爲其實，一般客戶根本唔明IRR，我作爲真係專業嘅金融人員，又過唔到自己去亂計，但真係計一個啱嘅Rate，通常得4、5、6%，好多客就會覺得低。
呢個就係問題，因爲4-6%，記得，係IRR，即係複息回報率（幾個概念有D唔同，但實操上，其實可以當同一件事），其實已經好高，但一般Laymen因爲根本唔明白複息嘅意義，最鍾意用Simple Interest嘅認知去衡量高低，就會話4-6%低。
要知道，複息的意思係，每一年都有呢4-6%，而且係乘數，唔係加數，即係你今年賺嘅回報，本身下一年都會有回報，而呢兩年嘅總回報，第三年又會繼續賺回報。
但客戶覺得4-6%低，因爲佢地睇到，或者自己真係買過股票，一個升浪，幾十Percent都閑閑地，一年先4-6%，緊係低啦。好似好多人呢半年都炒隻騰訊，之前萬五點時200蚊敢入，炒返上去400蚊，成倍tim。
但呢一浪，就當你真係賺到100%，但下一浪幾時有？你真係叻過股神，今年賺到100%，下年都可以把握到另一個機會去賺無100%都幾十Percent？事實上，騰訊過去5年，有波幅，把握到都真係賺到錢，但升完咪又跌返，5年實際係跌左25%。
得一年有100%，呢個咪Simple Interest嘅概念。如果第二年蝕返50%，兩年總回報咪得返個吉，零啊。
所以用Simple Interest嘅概念去話Compound Interest嘅高低，咪錯曬lor。
再睇另一個例子，美國標準普爾500指數，過去30年（1992 ~ 2022），總回報有781%，好厲害啦，所以我成日話，强積金最緊要買美國基金。如果你個退休金（1992年未有MPF），投左一筆落標普500，你今日退休100萬變接近900萬，應該都幾好啦。
但其實，如果你硬要我計IRR，我就可以話你知，複息年回報，其實只有7.5%。但因爲呢7.5%唔係一年有一年無，係30年長綫有升有跌，拉複式平均，年年都有7.5%，所以30年就有成9倍增長。
（順便講一句，有好多Agent，唔知道係有心，定唔識，會話呢個總回報781%，除30，咪係“平均年回報”，有26%。如果客戶真係唔識複息同單息分別，咪又話我7.5%低lor，所以我真係唔願意計IRR，計左，個客都唔明係乜。）
如果股票市場，其實IRR都只不過7.5%，但已經要承受可升可跌嘅風險，而一個分紅保單，有保證現金價值，保證唔會蝕本，而IRR都有4-6%，你話邊算低？
Comentários