top of page

回報率計算;唔好再亂計啦


作爲一位專業保險中介人,計算回報率係一項基本技能。但實際上,我見到太多應該係專業嘅中介人,將回報率亂講一通。最常見嘅,就出現係保費融資上。


首先,大家要清楚,回報率係有一個約定俗成嘅定義,唔可以話我地有我地嘅特定計算辦法就可以亂講一通。唔係話我地鄉下叫有角嘅做馬,無角嘅係鹿,你吹得我地漲?


如果我地話比個客聼個Plan嘅年回報係4%,意思只有一個,就係年頭個客擺100蚊入黎,年尾個Plan就有104蚊,唔可能有第二個意思。當然,你可能會話,保險呢個產品,本來就唔係講一兩年,頭幾年退保會蝕錢,係常識啦。好,接受。如果我地話20年持有期嘅年回報係4%,意思就只有一個,就係100 x (1+4%) x (1+4%)…(乘20次),即係219。如果計劃書上嘅現金價值少過219,就係代表年回報無4%。(當然,呢個係講Lump Sum Plan,簡單D,如果係年供計劃,計算會複雜一D,但道理都一樣。)


好似附圖,係某一個U-Life嘅表。上面有一粒數4.3%,於是好多中介人鍾意同個客講,個Plan有4.3%回報,而家銀行貸款只係1.8%,中間可以賺2.5%利息差。問題係。。。如果係4.3%,點解投100萬,一年得番86萬?好似唔係賺4.3%,係要倒蝕!好,保險唔應該睇頭幾年,我地睇第10年,退保價值112萬,總回報12.5%,唔使計複息,就咁除10,都係得1.25%,邊有4.3%?如果認真D開10次方,年回報只有1.19%,點夠冚貸款利息?就算延長到30年,退保價值194萬,年回報都係得2.25%。


其實保險公司有法務部,計劃書講得好清楚,呢個4.3%只係派息率,Gross果個數,要減一堆其他成本(起碼要出佣金比我地),先得到退保價值。但如果中介人令客戶誤會呢個係回報率,有心誤導(呃)當然抵死,但就算係無知犯錯,作爲專業中介人,無知都係罪。



bottom of page