話説，呢兩個月，香港股市衰就唔係今日嘅事，就連美股都高位調整（強調，唔好聼華文報導有立場果D，成日話美國就黎冧，美股今年升左好多，調整下好正常，暫時我地仍然睇唔到美國經濟有任何好悲觀跡像），私人銀行客戶究竟有咩好玩？
呢一年不斷加息，買高評級債券，Lock住未來十幾年高利息，就已經係我地主論調好耐啦，例如滙豐銀行發嘅債券，最簡單果隻，唔係AT1（瑞信爆煲果種），都唔會搞咩野永續債或者太長年期，中間D十年期，都做到大約6%。
未來十年，每年受益6%，保證，而且到期一定攞返本金（因爲滙豐根據合約一定要還錢），除非滙豐執笠，否則無任何風險，你話正唔正。
因爲買債券，通常响私人銀行一定加杠桿買，雖然已經唔會掂太長年期啦，但10年期，都唔可以話短期，流動性都係要考慮，所以唔會做到最儘。
但人，總係貪心，客戶永遠會問，有無得賺多D。但再買債券，突然市場有咩野波動，要補倉，咪又係煩。所以，我會叫客戶最後果注，做定期存款，而家高息，三個月美元定期，都5.6%。
而用瑞士法郎做貸款，資金成本只係2.8%，中間可以套到2.8%息差。而且存款無咩風險，可以杠桿好多倍，就算客戶最後額度得返少少，20萬美金放到100萬存款都好平常。3個月執7千美金，成5萬港幣。記得，原來嘅債券投資繼續做，呢5萬係無端端多出黎。
存款，又無咩風險，萬一市場波動要撤退，隨時Cut都無咩問題。
唯一唔好，就係作爲EAM，客戶做存款我地無佣金收。但有時候，要睇成個Portfolio，唔係逐筆數計。呢邊當免費So個客，你之後同佢講份保融，就算佢出面成打Agent圍住，都一定同你買啦。
調轉講，我成日聽到好多Agent朋友同我講想做大單。但有錢做大單嘅客，肯定都會做好多其他理財。你净係識講保險，人地出面又幫手開私人銀行，又建議投資，做存款偷下雞都賺幾萬，你有咩競爭力？
所以我成日話，要做大單做HNW Client，一定要Upgrade自己做財富顧問，唔好成日畫地自限，今時今日净係做保險，仲要净係做一間保險公司嘅Agent，唔好話客觀性已經輸（NHW Client好識野，好敏感Advice嘅質素），賣黎賣去都係幾個產品，我係客戶都唔幫襯你啦。
Comentarios