Being Rejected，係做Sales呢行日日要面對嘅事情。
但你有無深入分析過，拒絕呢件事本身内含嘅邏輯意義？
客戶拒絕你，當然有可能係你個人問題。最簡單，人同人嘅Chemistry好奇妙，個客就係唔鍾意你，咪唔幫你買lor。唔講對人，客觀D，可能係你自己唔夠專業，對產品鑽研唔夠深，講唔到個賣點俾個客聼，客戶感受唔到點解要賣，咪又Reject你lor。
個人問題係有機會嘅，但更多時候，客戶唔係針對個人，係真係個產品唔啱，一）客戶根本無呢方面嘅需要；二）有需要，不過唔滿意你嘅產品，覺得（或者知道）市場有其他更好產品。
第二項就係其中一個定位問題。
如果你定位，係其中一家保險公司嘅Agent，你責任係向客戶推銷你公司嘅產品。如果你公司產品，無對應客戶當刻需要嘅選擇，無論你做得幾好，例如出面好多扮專家嘅Trainer成日挂口邊嘅“話術”，或者好多保險公司成日賣廣告，咩野幫人、敢做、聆聽之類，都無用。
例如好多大公司，都不屑出一D短期計劃，咩野第一年開始就每年派4%，或者供兩年然後第三年每年6%，一律唔做，因爲對公司而言，無肉食。但恰恰呢D快見效嘅計劃好受客戶歡迎。公司無得做搞到你Sell唔到客？呢個係你問題啦，公司無興趣管你死活。
客戶唔想鎖，你公司就只係得最快都十幾年先回本嘅計劃，唔啱就係唔啱。
唔通因爲你講野好叻，搞笑過黃子華棟篤笑，或者你好好人，成日幫人，就夾硬幫你買嚒。就算當可憐下你，都唔會買得大啦。
我地主要做百萬（港幣或者美元）以上保單，唔通客戶同你講交情咩，一萬幾千應酬下，都有機會，講到成百萬（甚至美元），客戶一定要貨比三家，研究得好清楚。
而第二個層面就更麻煩：就算客戶真係覺得你嘅產品好正，但既然知道你只係代表一間保險公司，尤其係做大單，肯定要問多幾間保險公司，有無更好Offer。殺出程咬金，夜長夢多，肯定係麻煩。
尤其如果遇到我呢D定位自己係獨立財富顧問嘅賤人，間間保險公司都做得。要知道，呢個世界上，無絕對最好嘅產品，每個產品都有長短。（唔好自己呃自己，以爲大公司產品一定最好，呢D只係公司内部嘅大内宣而已。事實上，大公司恃住自己品牌，又要顧住股東利益，分俾客戶嘅紅利通常少D，唔似細公司，有時候為左搶市場，寧願賺少D，都出個好Plan。）
我一定無限放大你公司個計劃嘅弱點。（記得，每個計劃都一定有。）而當你反擊我，也放大我推緊個計劃嘅弱點，我就趁客戶俾你Sell到好Care呢點嘅時候，突然又介紹多一個其他公司嘅Plan，恰恰就响你無限放大個點上最强。如果未夠，我可以再出第三個產品，十個八個打你一個，你點應付？
所以，如果你定位係Selling，你一定贏唔到定位唔係Sell，而係同可以一齊去買野嘅顧問。
コメント