呢一年我都踩派息基金好多，無他，因爲今年經濟環境轉差，呢D實際係買垃圾債券嘅基金跌左20-30%，賺多多息都唔夠冚，輸到好多人喊（包括好多6、70歲退休人士，我親眼見過）。
其實今年加息，好多合資格投資者都興買企業債券。例如滙豐控股（真係005果間），4年期，都有6% Yield to Maturity。持有到期，本金同利息都係保證，唯一風險就係滙豐銀行唔還錢，違約。
我嘅態度好簡單，從來唔對滙豐（或其他發債企業）會唔會執笠作任何分析或者保證，你覺得滙豐唔會執笠，咪買，覺得會，咪唔好買lor。不過話時話，如果滙豐作爲銀行龍頭，你都覺得唔穩陣，即係其他銀行仲牙煙，你係咪無存錢銀行？現金放屋企？（我可以計劃得閑過黎打劫。）
另一方面，我唔止一次見過D財經演員，話保險係要黎呃親戚朋友，要穩陣，不如買債券就好。部分來自第二個平行宇宙嘅言論，話儲蓄保險好多年都唔攞得呢D非事實言論就唔好講。事實上，而家好多儲蓄計劃都可以首年、第二年或者第六年開始攞4-6%，而且有不同程度嘅本金保證。但呢樣野，債券都做到，據呢D書生講。。。。
係啊，我都讀過，大學果陣時，Textbook都係咁教：買債券有穩定派息，適合低風險投資者。但我真係想問下呢D書生，叫人地唔好買保險，買債券，實操上有邊隻債券可以推介一下？唔好成日講理論，要有實操性啊！！
要知道，企業債券一般最低投資額係20萬美金，好少數例外，都要10萬美金或者50萬港幣，而最重要唔係你有呢160萬港幣就可以買，因爲根據香港監管架構，大部分債券，只有專業投資者，即係有100萬美金响投資戶口，唔該印張Statement出黎證明下，先可以買到。
係，市場上都仲有好少數供零售投資者買嘅債券，例如iBond同銀髮債券，但情況就好似你買股票，净係比你買恆指成分股，你仲有幾大興趣投資？
如果你未夠秤，唯有買iBond，確實係最少1萬港幣就買得，但就算而家高息時期，都係得大約2%派息（滙豐債券票面派息有5%），加埋1年半後3.5% Captial Gain，Yield都係4%左近。最大問題係，呢隻iBond得1年半，如果我想趁高息，鎖定未來10年8年回報，唔好意思，你唔係Professional Investor，企業債券你唔買得。
而儲蓄保險面對嘅客戶，大部分係只有幾十萬，甚至月供幾千，就算少部分有一百幾十，都Far From 專業投資者嘅要求啦。想未來10年20年有穩定4-6%回報，為退休做下準備（或者已經退休希望有錢派下作爲生活費）姐，你叫我唔買保險，買債券，有邊隻債券介紹下？不如你都係返去象牙塔，唔好出黎柒啦。
Comments