如果單純做保險，應該無咩需要接觸風險分析呢件事。但時至今日，好多保險從業員都會做Link單同埋强積金，甚至好多好似筆者呢D Wealth Consultant，直頭攞埋證監牌照，真係提供投資建議，如果咁樣，風險評估就係一個不可避免嘅課題。
最簡單嘅方法，當然就係參考保險公司或者基金公司嘅風險級別分類，例如新興市場基金通常都係最高風險個級，環球股票就中間，投資級別債券就中低，但話自己係派息基金實情係垃圾債券個D，就中高。
另一個行業同學術界經常采用嘅概念，就係資產價格嘅波幅，通常用標準差，Standard Deviation，黎量度。簡單D講，如果一樣投資，回報大上大落，就係高風險。
但如果風險係咁簡單，一個級別一個數字，就可以比較，咁客戶自己揀就得啦，使咩投資顧問。
實情係，呢D風險評級同統計數字，可以作爲一個起點，但如果要實操上真係俾客戶一個有用嘅建議，就要配合實際情況同人性嘅考慮。
舉一個簡單嘅例子。
假設有兩個投資項目，一個有大概2/3機率可以賺20%，另外1/3機率就蝕10%；另一個就有1/3機率賺30%，另外2/3機會就打和無賺無蝕。
數學上，呢2個選擇嘅預期回報都係大概10%，而Standard Deviation都大約係14%。學術上面，兩個選擇風險一樣，回報一樣，揀邊個理論上都一樣。
但實際上，大多數客戶都會揀第2個選項，因爲對客戶黎講，風險唔係波幅，甚至咩野係波幅，大部分客戶都無咩野感覺，反而佢地驚嘅係蝕本。
第1個選擇，雖然大部分機會係賺，但都有小半機會係蝕。而第2個選擇，就算賺錢機率低過50%，但就算無錢賺，都起碼唔使蝕。
如果我們修改一下第一個選擇，就更明顯。如果1/3機率唔係蝕10%，只係蝕5%，不過都係蝕。咁預期回報同標準差會分別提高到11%同降低到12%。住响象牙塔裏面，幾個PHD學位嘅專家，一定會叫你建議呢個選擇俾客戶。
但如果你真係將呢套書本理論照搬，你都好難响投資顧問界撈得掂。應該好多客戶會話你，點解有隻保證唔會蝕本嘅唔介紹，介紹隻會蝕本嘅？我唔知咩野Deviation，我净係知你叫我揀左隻蝕本嘅去買！！
作爲Advisor，我地嘅工作係幫客戶去揀令佢買完瞓得著嘅產品，唔係話阿Mr. Client，你咁樣揀，唔符合阿Professor教果套。點解有D投資顧問，一講客戶就信，其他果D，講來講去都係火星話，客戶聽到一頭霧水，原因你自己捻下。
Comments