限制性條款探討之一
今日改變一下口味，講一樣同我地從業員好切身嘅法律問題，係關於一樣叫限制性契約（Restrictive Covenant）嘅合約條款，就係大家份Agency Contract裏面，話離職後幾耐唔准重投行業，又唔准Call D舊客之類果D。
（先戴頭盔，筆者唔係律師，只係多年參與保險管理工作，如果涉及保險行業嘅法律，因爲工作需要有一點點研究咁。）
首先可以同大家講，合約法上有一個關於限制商業自由原則（Doctrine of the Restraint of Trade），就係generally speaking，法庭會基於公衆利益同政策考慮，判呢類唔俾人做呢樣又唔俾做果樣嘅條款，「初步認定無效及無約束力（Prima Facie Void and Unenforceable）」。
因爲英國法律（作爲今日香港法律嘅重要起點）一個大原則係去建立一個公平又有保障嘅環境去promote商業活動，唔係抑制。例如我作爲Agent，轉投另外一家較有前途嘅保險公司，係一項商業自由，一方面當然對我事業前途有幫助，但另一方面都係對整體經濟有推動作用。夾硬唔俾我走，其實就係阻住社會進步！！
所以，如果各位真係有一日要轉工，公司用合約裏面呢D條款去警告你，放心，起碼响起點上，道理响你呢邊，唔使太驚。呢個係第一回合。
但係，呢類限制性條款，都唔一定無效。法律係講道理嘅，如果公司可以證明，呢D條款係合理同必須，就可以推翻無效呢個假定。下一次我們再深入講下。
Comments