之前Silicon Valley Bank同Signature Bank都執笠，呢D地方銀行都算啦（未執之前，我相信大家都未聽過呢兩間銀行），之後連大名鼎鼎嘅Credit Suisse都出事（雖然傳左好耐），甚至德意志銀行都有𤓓味，搞到好多人都好驚，係咪成個環球金融體制崩毀嘅開始！？
如果話你知，呢排發生嘅事，我早半年就估到，你信唔信？
你一定會話：唓，馬後炮，吹水怪，你連Silicon Valley Bank同Signature Bank之前都未聽過啦，出左事先黎話先知。
哈哈，當然，我又唔係九流分析員，點可能一早就估到呢兩間銀行會執。我意思係，你睇返我大半年前叫大家小心D派息基金（垃圾債券基金）時，就講過，千祈唔好信咩野跌左好多，派息又高，可以趁低位買入，可以賺息賺反彈，因爲呢D垃圾債券，下年（上年講，即係2023年）環球經濟差，D低評級公司執笠風險（挨唔住）先係最高。
所以，幾間銀行出問題，我係唔知，甚至出事嘅係銀行，都有D出乎我意料，我本來以爲只會係其他細公司出事（其實兩間銀行都算係細銀行，不過叫得銀行，再細都影響深遠）。但係我就一早知道，經濟周期行到呢個階段，總會有D公司執笠，唔知邊間姐。
唔好話咁有鬼用咩，起碼我知道係呢個階段，唔好買垃圾債券。
（講開有講，過埋呢輪，D公司要執都執曬，下年可能係時機買返呢D垃圾債券，不過重點問題係，大部分買派息基金嘅投資者，本來就係想穩定收息，風險接受程度低，其實咩野時候都唔應該買呢D垃圾債券。）
呢D就係我地話善易者不卜，因爲只要你明白世事萬物，都有因果規律，你唔需要起卦占卜，只要知道趨勢周期，就知道下一步會發生D咩。就好似坤卦初六，履霜，堅冰至。初冬都開始結霜，好快自然就會落大雪啦。
調轉頭講，大家見到連銀行都執笠，又唔好以爲世界末日。就好似冬天就算幾凍都好，之後一定會春回大地。所以我地成日話冬大過年，因爲我地文化一早就知道，陽氣開始增長（或者可以科學化D話日頭時間開始變長），唔係由新年開始，其實係冬至開始。
可能有人會話：睇下，美國幾大鑊，銀行都爆得，呢D咪制度劣勢lor。但係資本主義社會就係咁，一個一個周期，係周期底部，就要淘汰一D弱雞企業，咁樣先可以新陳舊謝，為下一個繁榮周期創造條件。反而如果政府夾硬去救，D問題無爆出黎，越積越大，表面好似優勢過美國，但累積到再冚唔住嘅時候，一煲過爆，你話係咪仲大鑊？
就好似平時小病下，身體抵抗力自然就好，大病機會就細。反而一D好日都唔病下嘅人，一病，就死得都有份。咪呢個道理lor。
Comments