top of page

金融精英唔好再連iBank同PBank都分唔清楚


果日,因爲睇到保監局發Explanation Note,特別關注坊間D保險資訊平臺,於是上網索下呢D平臺嘅背景。Google一下,讀到一篇文章,應該係之前嘅報導,有記者訪問嘅稿。内容有D都幾好笑,亂噏一通。不過,我覺得有機會係記者亂寫,唔關個網事,所以我都唔開名,純針對内容,大家笑下就算。



其中有話,有D保險條款好深,就算做過iBank都睇唔掂wo。(潛臺詞係,標榜佢做過iBank,好勁!)


首先,可能筆者讀法律出身(係啊,好勁ka),咬文嚼字呢D書生野係强項,從來唔覺得保單條款有幾難瞭解,大家用平常文字去讀就可以。例如之前講到危疾賠償賠比邊個,AIA條款係“於受保人在生期間,若持有人仍然在生,我們會將保單内所有需支付的利益支付予持有人”。我就睇唔到有乜野好難明白嘅地方,應該唔需要請教大狀。其實,呢幾十年,法律界都開始流行用Everyday Language,不妨鼓勵客戶自己多直接閲讀條款,認識自己嘅權益。


但文字係深係淺,都好主觀,老實講都好難話對錯。我其實想講嘅係,點解iBank經驗同理解保險條款能力會有關係??iBank,即係Investment Bank,古舊一D,叫Merchant Bank, 商人銀行,其實係指針對服務重大、複雜嘅金融交易,簡單D講,就係有關收購合并,公司上市,再唔係就係發債等等,網絡年代我地叫B2B嘅業務。如果有關私人財富,B2C而服務比較有錢嘅客戶,例如幾百萬美金起表,我地叫Private Bank,或者PBank。雖然差一個英文字母,但兩個唔同嘅行業。


無可否認,iBank係金融界嘅貴族,所有金融從業員(係啊,包括我)都夢想有一日可以參與,高盛、大摩,肯定係所有阿媽都會鍾意同姨媽姑姐大講特講嘅公司,如果。。。如果個仔(或女)真係入左去做。但理性D講,iBank,係一個專業,專業嘅意思就係,專。呢個範疇以外嘅,無責任要識。點解做過iBank,就表示對保單條款嘅理解會特別高?如果你去高盛見工,人地問你有乜野專長,你答我之前幫好多保險公司Draft條款,人地會點睇?不如你見其他保險公司啦,可能會適合你多D。


如果有飛機師同你講,揸貨車好難,因爲我揸過飛機,都揸唔掂貨車。你會點捻?


當然,飛機師肯定係好多父母望子成龍嘅其中一個Scenario(疫情之前!!),但係唔係代表,揸飛機好難,揸貨車好易,識揸飛機就無理由唔識揸貨車??事實上,兩樣野根本唔同。點解識揸飛機就代表識揸貨車??(疫情下,揸貨車好揾過揸飛機!!)


我睇到呢D亂噏廿四、偷換概念嘅Reasoning就忍唔住要出黎閙下。所以,保監局發聲要監管下,睇黎,都有一定道理。

Comments


bottom of page