耐唔耐就會有新聞，有Agent俾老廉捉射單，案情都係好老土果D，經理簽單，然後話係下綫做，於是就可以出個人佣金，同時再出管理佣金。
根據廉署講，2016到2020年，每年平均都有40單關於保險業嘅貪污投訴，而2021年9個月就有32單。投訴個案中，有40%係關於“射單”呢個行爲。
違法行爲緊係唔啱（公開文章緊係咁講），但係，如果一個制度設計出黎，有漏洞可以被人利用，甚至提供好大誘因引人犯罪，而且一次又一次出現問題都屢次唔改，算唔算係一個有心整出黎嘅陷阱？法律上肯定無錯，但道德上算唔算有問題，大家自己衡量。
其實，射單行爲背後，就係源自一個極端唔合理嘅Agent制度：
Agent無論職級，就算做到區域總監，自己做數嘅佣金率，都係同最低級嘅新人一樣（大概係Broker的40%）。但係，如果張單係下面做，做單果個有個人佣金就當然啦，然後上綫仲可以多一筆管理佣金。
於是，如果唔理犯唔犯法，純計數，緊係有單都唔自己做，比下面做，兩個人加埋可以收兩份佣金，然後大家協議分錢，就算要留一D比下綫，管理佣金再加部分個人佣金，都肯定比單純個人佣金高。呢個就係點解行業内咁多人射單嘅原因。
大家有無留意，拉親射單，都一定係拉Agent，從來無拉Broker。唔通Broker D人個個都品德高尚（我係^^），從來唔犯法？？
係唔係我唔敢講，但係Broker嘅佣金制度，根本唔會有呢D屢次出事都死不悔改嘅漏洞。响Broker嘅世界，每個人同公司合作，都有一個Rate，係高係低，就睇情況，例如生意量、係唔係自動波、要唔要位（香港地串金尺土）等等，好符合商業原則。
然後，如果呢個人要Build Team，就一樣按情況定一個Rate比下綫。通常跟得Team，就肯定Green D要人帶，Rate會低D，於是Team Head就賺自己個Rate同下綫個Rate嘅差價，叫Override，作爲帶人（指導新人）嘅報酬。所以，無論張單邊個入，公司比出黎，亦即係Sales總收嘅，都係一樣。所以，Broker根本唔會有射單嘅誘因。
有云，殺頭嘅生意有人做，蝕本嘅生意先無人做。與其不斷用刑罰黎阻嚇，不如大家真係反思下從根源去杜絕問題。就算話係罪有應得，但不斷見到人出事，都唔好啦。
Comments