今時今日，同20幾年前筆者入行嘅時候有好大嘅分別。舊時，好多人未經歷過金融海嘯，恆生指數又無試過15年都係原地踏步（啱啱星期五收市20170，但第一次突破2萬點，已經係15年前），我之前Sell客買基金，話可以分散風險，好多人都會話寧願買股票直接D，回報仲快仲高咁話wor。
但呢十幾年投資市場經歷風風雨雨，感覺唔少投資者都變得比較踏實，所以而家成日見到好多“收息股“嘅推介。
但我從來都非常反感呢一類咩野“退休收息之選“嘅所謂建議，因爲股票嘅本質，就係有升有跌，而且就算個別公司嘅業務有幾防守性，只要係上市股票，就難免會受大圍投資氣氛影響，出現好多唔關自己事嘅市場波動。
簡單黎講，股票，係一個好好嘅投資工具，適合可能較爲年輕嘅投資者，做中長綫持有，因爲長綫黎講，可以提供比利息（無論係存款、債券抑或保單嘅利息）更高嘅資本增值。但對已經退休、保本係第一考慮嘅人士，股票呢一種資產，根本唔係一個好選擇。
例如中電呢一隻所謂嘅公用股，竟然可以一日内出現7%嘅跌幅（6月21日）。如果係一隻平常嘅股票，有升有跌，有咩野出奇，但呢隻股票係好多“股評家”都經常掛响口邊，推介作為穩定收息（股息率4.47%）嘅投資工具啊。
本來預期係爲左穩穩陣陣去賺4厘半嘅派息，而事實上又真係一隻公用股，應該都有穩定嘅業務，但竟然一日可以跌7%，如果睇52周高位80.5，行文今日已經跌左15.40%，派息賺埋唔夠蝕，咩野嘅退休收息概念！？
所以我呢5、7年，都基本放棄左股票、基金嘅業務，因爲有升有跌，蝕左錢客戶果邊都好難交待（話比你聼從來無蝕過嘅，都係騙徒），而最重要係，蝕嘅時候係你問題，賺嘅時候係市場環境好，點都係死，何必？
而家主力做儲蓄分紅保單，穩穩陣陣俾到客戶每年5%派發，無壓力，幾舒服啊。
最重要係，如果客戶只不過係要求每年4-6%嘅利息收益（中電4.47%），分紅保單勝任有餘，而且就算有部分派發係非保證（股息其實都無保證，而且相比保險公司分紅政策，會受到更多嘅不明確因素影響），起碼都有一個保證現金價值，就算咩野非保證紅利都無，响某個年期（3-15年，視乎保單結構）起碼可以保證本金，呢個係任何股票都唔可能提供嘅。
所以，理財最重要就係針對目的去選啱工具，無可能同一種工具可以適合所有情況。其實今時今日，同時挂牌證監會（投資）同保監局（保險）都唔係難事，點解仲要因爲自己係做股票生意而硬係要推咩鬼退休收息股票？
Comentarios