top of page

賣左咁多,你有無瞭解保險計劃嘅最大優勢?


作爲Sales賣野,最緊要知道自己賣緊嘅野有咩野賣點。如果連自己嘅產品都唔研究透徹,點説服客戶去買?


金融產品繁多,好多時候都會有其他金融產品嘅從業員出黎踩保險。不同產品各有各優勢,百花爭鳴其實對投資者有利,但作爲一名保險從業員,你知唔知自己响呢個競爭中有咩野優劣勢??


如果大家有睇開我之前文章,都會聽過我講,我自己唔真係保險Agent出身,而係一開始就做獨立財富顧問,即係除左有賣保險之外,其他例如股票、基金、債券等等,咩都做過。


但呢幾年,除左高淨值客戶仲會建議下私人銀行D結構性產品之外(如果明白風險,又有足夠彈藥,真係好玩過直接買股票、基金好多),一般客戶我都只建議買儲蓄保險就算,勝在穩陣,唔會無端端跌幾十個Percent。你估個客日日打黎問你點算,唔大壓力呀?


而最重要係,保單仲有一個其他好多投資工具都無嘅特點,就係除左一兩個例外產品,所有保單都會有一個保證價值,或長或短,保證本金。


我地做金融嘅,成日都話,回報係第二,回本先係第一。


例如好多財經Blog,叫人買D“退休收息之選”,例如隻港燈,公用股,派息率5.83%,但今日報5.47,比高位跌左31%,算咩野派息概念??


而呢幾年賣得好勁,美其名派息基金,實際係垃圾債券基金果D就更加唔好講。我見左幾個六七十歲老人家,俾銀行渡左買,話有8-9%派息,但今年跌左接近30%,喊曬口問我點算,我真係無語。


(其實我真係唔明,銀行都有保險賣,有穩定收益,又有保證現金價值,唔會蝕本,最重要佣金仲高,點解要賣呢D垃圾債券比老人家,真係奇怪!)


成日有財經演員踩保險,話直接買股票、買基金、甚至直接買債券(呢個真係最好笑,100%書生之言,有機會另文笑下)仲好,我真係想問,你話呢D好,但係唔保本wor,個市一個大跌,D人信左你地,棺材本都蝕埋,有幾好??


我近年專心賣保險,客戶有穩定收益,就算死要拗紅利係非保證,都起碼有一個保證現金價值保本,唔怕無面目見客戶。


所以,作爲保險從業員,真係唔需要妄自菲薄(抛下書包),其實我地賣緊嘅產品,根本就好有競爭力,對好多客戶都非常適合。只要落D苦工鑽研下點樣賣Saving Plan嘅唔同戰術、花式,真係無需要有好野唔賣,走去賣咩野派息基金。

Comments


bottom of page