見客一定要西裝打呔？

最近認識好多响保險公司做嘅Agent朋友，佢地都話，Team有規矩，見客一定要著西裝打呔，如果比Manager知道無做，一定會閙。之前，我都試過去保險公司舉辦嘅CPD，都比人話點解無著西裝同打呔。當然，我都好尊重活動，唔打呔其實都係Polo Shirt，同深藍色牛仔褲（唔係洗水白曬果D），標準Smart Causal。

首先，我唔係反對見客要注重衣著，但Smart，唔等於成套西裝。西裝只係其中一個Style，有時候適合，有時候就可能唔適合。事實上，成套西裝好Sales感覺，試下諗下，你約個客放工响Starbucks傾，今日好多客其實返工都唔使著西裝打呔，然後你成套西裝，秒秒鐘話俾人聼你係Sales，今日黎Sell野㗎，無端端引起個客戒心，有咩野為？

講返果次CPD，保險公司果邊話，其實上堂，都要當係見客咁尊重先得，我就話，啱啊，我見客，大江南北跑勻，見幾億身家果D老闆（係，幾十億以上果D富豪，我真係無接觸過），都係咁著。你仲話教人Selling Skill，咩野係高手，都唔識？

見大客，唔通成個Sales款，拎住個公事包，見到個客就即刻拎曬一疊Brochure出黎，阿巢總，你覺得邊個啱你？

有幾多老闆級嘅人，會日日老西返工？起碼你個大客自己都唔會啦。你山長水遠跑去，都係一身老西，人地根本唔當你係同級，點同你傾？當然，唔係叫你爛身爛勢，一件光鮮嘅Polo，下身一條深色無洗水嘅牛仔褲，代表你都唔係返工要著西裝果D打工仔，坐低慢慢飲杯茶（大陸文化好興，老闆房一定有一張沏茶嘅几仔），互相瞭解下（記得我之前講過，KYC好重要），套下交情，之後先慢慢講產品嘛。

有D人話，著西裝先係一個專業形象嘛。但專業，唔係應該體現响你對產品嘅熟悉程度？或者對客戶痛點嘅分析同解決能力？？唔不斷鑽研產品（老實講，保險公司推新產品出果本產品手冊，有幾多人睇過？），唔訓練自己同理心（Empathy），諗住著套西裝，就可以自然變成專業？

況且，一套西裝嘅形象，今時今日，你覺得可以比個客覺得你有幾專業，定覺得你係一個Sales多D？專業嘅Sales就有機會！

筆者自己入行20年啦，Selling Skill（嚴格而言係獲得客戶信任然後一齊去Buy嘅Skill）都自問有一D，一開口個客就Focus我講嘅野，同分析，根本無人會記得我有無著西裝。所以反而Causal一D，等個客放鬆D同我傾，仲好。

當然，我唔反對如果一個新人，Skill真係差D，經驗無咩，靠套西裝扮下，起碼自己都好似安心D，無妨。所以，Induction Training，教著西裝同打呔，我完全唔反對。但如果認爲做左3、5年以上嘅人，條Team仲覺得日日返工執到正係天條，咁就真係代表唔知道咩野叫做高手高招啦。