top of page

要克服怕Selling嘅心魔?


首先,我唔係話呢樣野唔重要,正如我講過,之前有一個Sales Director,叫自己Sales,但其實根本唔敢去揾客、面對客戶,點得。


今日講呢個話題,係因爲最近有Agent同我呻,呢排環境唔係好好,Team Head就同佢地講,你地無生意,係因爲你地仲有心魔,唔敢係人都Sell下。講到好似只要有心態就咩都得,曉得飛tim。阿Team Head,你心態咁強,你飛比我睇下!


如果有新人,真係信左呢個爛鬼Team Head講,之後逢人就問,你買左保險未?危疾夠唔夠?買左,都可以買多份wor(,因爲我要做生意嘛)。呢個新人,好快就會謝皮,因爲基本上Rejection Ratio會係100%。


但無所謂,你去瘀皮之嘛,又唔係佢,就好似睇戲睇小説,有D無料到將軍,大大聲叫人冲啊,無所謂,對方一排機槍打過來,死你之嘛,又唔係死佢。


但真係有戰鬥力嘅軍隊,有料到嘅將軍,會先研究成個地形部署,然後叫炮兵、空軍,先炸敵方陣地,打窒佢地先。然後分幾個小隊,幾個方向攻擊分散敵方火力,互相掩護。仲要每個小隊都有多種裝備,手提機槍(火力掩護)、狙擊步槍(遠距離擊殺)、逼擊炮(攻擊隱藏陣地)、反坦克火箭(睇下烏克蘭)等等,應付不同情況。呢D咪叫做戰術。


其實,銷售都要講戰術,例如研究多D產品,玩熟D,知道邊個產品可以點樣解決客戶最關心嘅需要,當然更重要係要先瞭解客戶嘅情況、需要,發掘客戶心底最深處嘅諗法。所以,無生意,永遠歸咎於心態,就好似得支步槍上戰場,打唔爛人地架F22(响天空飛,音速2.25倍,比步槍子彈得果一倍音速仲快),返黎比上級話你打唔贏因爲你對國家對黨有懷疑,如果唔係點會打唔贏D美帝主義份子?


唔係話心態唔重要,但更多情況,唔夠嘅係產品同銷售戰術嘅培訓。真係要改進條Team業績,我從來話,做多D Case Study,得閑Joint Call比D細嘅學下野,針對人員銷售技巧落功夫,好過日日歸咎心態。不過,咁都要阿Team Head真係有料先得,如果唔係,都唔知道有咩可以教你(因爲自己都唔識),咁就不如話係你心態有問題,簡單D。

Comentarios


bottom of page