之前講過，有D Team要求返工、見客一定要著西裝打呔，其實係好錯，因爲呢個思想背後，就係代表一個懶惰思維，以爲一條公式就可以所有情況適用，唔去根據實際情況變通。
我曾經聽過，拿破侖當年點解用兵如神，因爲每一次，佢都會响會戰之前，同參謀選定戰場，然後仔細研究地形，邊度有山丘，邊度有溪流，邊度可以隱藏後備隊騎兵，邊度可以居高臨下部署炮兵？總括而言，戰場上每一個細節，都係精心部署計劃，唔會到時候先執生。
我聽完好有感觸，所以我而家見客，都好講究規劃“戰場“每一個細節，衣著就係其中一環。重點係要配合到我想客戶對我有咩野觀感，然後有利我做得成生意。
著西裝打呔，响某一D特定場合，真係會使人覺得Pro，例如如果你約個客上你Office，而你Office响甲級寫字樓，公司會議室仲裝修到好Elegant，咁你一身老西，最好加多件背心（雖然可能夏天出面成30幾度），就真係型到爆。呢D造型，就係中環置地果D律師樓格局。
但係，呢個格局，第一個感覺當然係Elegant，但係伴隨一定使人諗到呢間律師樓食水好深。我有緣上去，都係公司買賣，買家係大陸人，大把錢，唔介意請呢D大行。（唔係你以爲我打劫殺人，要請律師辯護咩。）
如果係我自己要揾律師搞D野，我呢D Cheap精，一定揾果D上環、灣仔，500呎Office，然後一入去成地下File，會議室細細，然後個律師就算恤衫西褲都肯定唔會打呔。我每一次都唔會覺得阿律師唔Pro，因爲簡單野（都話唔係殺左人要辯護），最緊要平。（我啱啱禮拜一就上左一間呢類律師樓簽份股權買賣協議，個女律師都無著套裝，如果响街，你一定唔會覺得佢係律師。）
所以，衣著係要配合場景，最重要，係你想個客有咩野感覺，從而令到你順利Closing，例如要有Elegant感覺，增加客戶信心，抑或因爲係簡單野，最緊要使客戶覺得經濟實惠？例如你只係幫個一般員工轉MPF自由行，你成套三件頭，嚇死個客，可能第二次唔敢“勞煩”你，你連Cross Selling機會都無埋。
Comments