呢個禮拜，又收到有保險公司同我預告，黎緊會推新多元貨幣計劃，加入戰團。
之前講過，轉換貨幣呢樣野，其實真係無意思，純Gimmick，因爲如果無外匯管制，自己可以轉貨幣，無須保險公司代勞，而如果有管制，你份保單係咩野貨幣都好，都係一個數字，攞唔到出黎（除非外管局批准）。
下一個問題就係，究竟美元係咪會崩潰？因爲成日聽到話美國政府債務上限，無得繼續借就隨時破產。然後又好多人話祖國强大，人民幣先係未來國際貨幣，中俄巴西加埋一堆南美非洲國家，又話倡議去美元化，取而代之用本國貨幣貿易。係唔係應該買人民幣Plan先有前途。
市場上，百花齊放，道理先越辯越明，但人云亦云，其實好多分析係有心人放出黎，大外宣，大家要小心。
一個貨幣，值唔值得持有，只有一件事情，就係呢個貨幣嘅購買力。購買力係咩，就係你可以用手上嘅錢，去買你想要嘅野：賣家一手收左你D錢，另一手願意俾件貨你，咁就叫購買力。
記得，係唔包括要先換成一種貨幣再去買野嘅情況。例如我成日話，果D虛擬貨幣，我從來都不覺得係貨幣，就係因爲無購買力，或者好少購買力，例如你無可能用虛擬貨幣去超級市場買野，大部分情況都要先換返其他貨幣，先可以去消費。所以虛擬貨幣可以係一樣金融資產，因爲有價有市，但唔可以話係貨幣。
事實上，市場已經有傳聞，南美有D國家，因爲大陸俾優惠貿易條件，所以接受人民幣俾錢，但一轉頭，就將D人民幣換返美金，原因好簡單，因爲人民幣只可以買到大陸野，但呢D南美國家，根本唔需要咁多大陸野，反而需要美國貨、歐洲貨，所以需要美元去找數。
返番黎我地自己盤數，你今日選擇美元定咩野貨幣做Plan，就係睇，你覺得十幾廿年後，你想買嘅野，係用咩野貨幣找數。當然，幾十年後咩野世界，無人知。但如果你覺得有D野，都唔會變到面目全非，我地可以參考下我地今日嘅生活係點。
例如，你去旅行，你會去日本、澳洲（我Favour）、歐洲呢D地方，定大灣區？
買車，你會揀經濟實用嘅Honda、Toyota，定高檔Benz或者BMW，如果電車，Tesla，定你會揀比亞迪？？
電話電腦，你會揀iPhone，或者下一世代Apple果個Visual Pro（初步定價3500美金，是美金啊，Apple從來是美金定價），定華爲、小米？
你退Plan，攞返D錢再投資，你會投因爲生產Support AI 發展嘅晶片，今年都已經升左3倍果間NVIDIA，定二十年都係萬九點果隻盈富基金？
所以買Plan，真係無必要浪費心神去講咩野多元貨幣。
Comments