最近，有個客戶，因爲手上無美金，净係有100萬港幣，堅持唔要美元Plan，唔想唱美金，但係可以第3年就開始有錢攞嘅Plan，又一定係美金，多元貨幣果D，又要好多年先有野睇，結果同個客仲拉鋸緊。
另外，又有一類客，可能日日聼本地傳媒報道，成日以爲美國就快沒落，美元就快崩潰，買Plan，堅持一定要港幣或者人民幣。
關於呢個問題，有兩樣野想講下。首先，買Plan，美元好D定其他貨幣好D？第二，美元係咪真係好唔掂？
而家，各大保險公司出嘅計劃，都係美元計價為主流。尤其一D高回報，快見效嘅超强產品，一定係美元，唔會有港幣或者外幣。港幣計劃，只係危疾或者人壽，方便一D細單。如果講到大額人壽同大額儲蓄，就更加一定係美元。
其實係有原因嘅。保險公司收到保費後，無論係純儲蓄定有賠償，都要將保費投資，以備日後賠償或者派紅利俾投保人。關鍵係而家金融世界，仍然係美元天下，佔88%世界外匯交易（2022年4月數據），而紐約仍然係世界第一嘅金融市場，匯聚全世界儲蓄資金同尋求資本黎發展嘅企業。
無論企業本身業務响邊度，平日用開咩野貨幣去交易，講到融資，無論發債定貸款，都係以美元為主，貪美元市場夠大夠深，就算集資一筆大錢，相對市場都係細數，唔會扯高利率成本。
就算保險公司基金經理睇好中國企業，要買騰訊、比亞迪、中國銀行嘅債券，都係要用美金去買。
而呢幾年D Plan，為左爭取回報，好多都會去投資部分股票。蘋果、Tesla、Microsoft，甚至LVMH、Hermes呢D受惠中國消費嘅股票，都係用美元去買（兩隻法國股票，當然原本用歐羅，但可以用美金買佢地嘅預托證券）。
所以話，如果保單係用其他貨幣計算，保險公司仲要做多重外匯風險管理，而最簡單嘅風險管理，就係派息分紅時，保守D，派少D，留返部分萬一之後匯率波動，最終受害咪又係投保人（收益少左）。
而市場經濟，買賣雙方係互動嘅，既然美元簡單D，分紅又實際D，自然就會成爲主流。
偶然有港幣單，其實都係夾硬整出黎，背後都係要投返美元工具，呢個唔係我地個人，甚至保險公司有自由選擇嘅事情。而金融產品，越多轉換（港幣換美金），一定代表越多成本同麻煩，無可避免影響回報。
近年多元貨幣產品，特登要整色整水，好似真係可以揀好多其他貨幣，但最終大家都明白，都係要投美元工具。你要保險公司換保單貨幣做港幣或者其他貨幣，其實咪又係中間做一個轉換，但呢個操作一定有成本，最終可能反映係分紅率上，就算今日計劃書粒數點樣都好，到實際個履行比率，美元同港幣都可以唔同。
另一個問題，究竟美元係咪會崩潰？下次講。
Comments