top of page

經濟學點樣解析買保險嘅行爲?(上)


之前提過,網上見到有文章(應該係鱔稿)訪問某保險資訊網站,有D搞笑邏輯,之前講左第一個,今日可以用第二個好笑位做引子,講一個大大地嘅道理。


事緣果篇文章裏面,訪問果位精算師(嘩,專業人士),佢以賭場比喻保險,而買保險同入賭場一樣,客戶贏嘅機會少於一半,但賭都有賭嘅好處,都係一種娛樂。我真係睇到一頭霧水,D客買保險同入賭場賭錢一樣,為左追求快感??(所以,我强調,我真係唔覺得有精算師會咁不倫不類,好大機會係個記者一知半解、斷章取義。)


其實,點解D人明知輸(機會率不利賭客)都去賭錢,明知保險公司計過數都死唔錯人都去買保險,唔係因爲賭錢係一種娛樂,亦唔係一句保險可以轉嫁風險就可以混瞞過關,經濟學上一早已經有專門一套理論去解析(仲要係Year 1經濟,起碼我係Year 1讀,因爲我唔係主修經濟,Year 2之後都無讀易乾啦)。好似我呢D以專家自居嘅人,起碼都要吹兩咀理論,唔好話人地賭錢因爲人地娛樂囉,咁膚淺。


首先,我地要明白,人天生都抗拒風險,所謂Risk Averse。如果有一項投資,有50%機會賺10蚊,另外50%機會賺唔到,我地會話呢項投資預期回報(Expected Return)係

10 x 50% + 0 x 50% = 5


但係,因爲我地人類係Risk Averse,所以我地唔覺得呢個投資值5蚊,即係話如果我地可以揀,我地會寧願穩賺5蚊,唔會揀只有50%機會賺一倍嘅錢。(一般人係咁樣,不過近年經濟學界都承認有D奇人異士,會寧願揀非保證嘅機會,即係所謂嘅Risk Taker。)


調轉黎講,就係話,回報要高於10(例如11),於是預期回報都高過5,先可以吸引投資者放棄保證嘅5蚊回報,揀有風險果樣投資。


人壽保險(爲例)都係一個類似嘅計算。精算師會計算出一個預期死亡率,為左簡單講解,我地假設响一年内每1萬人就有一個因爲唔同原因死亡,即係死亡率係一萬份之一。而如果呢一萬個人都係保險公司嘅客,保險公司會賠償比唔好彩果個100萬。我地可以話預期“回報”,或者專業D嘅名詞係“净保費” = 100萬 x (1 / 10,000) = 100


即係如果1萬個人,每人夾100蚊,保險公司就收到100萬,年中邊個唔好彩就將呢100萬賠比佢屋企人。(聽講,幾百年前,保險就係起源於呢個操作,條村夾錢入公數,然後邊個唔好彩就攞呢條公數頂住先。)


但係,好似最開頭嘅例子,因爲人係Risk Averse,大家都寧願保證可以得到100(即係唔比保費,慳番呢100),而唔願意揀一個非保證嘅賺錢(?)機會。而另一方面,如果保費只係100,保險公司收埋都係啱啱夠賠,無錢賺之餘仲要蝕成本。响呢個模型中,保險根本唔成立。


但實際上,買保險已經係現代社會一個常態,正如好多人日賭夜賭。曾經,呢個現象令經濟學人百思不得其解,後來終於有一個解析,因爲人面對風險做決定,唔係睇財富嘅絕對數字(即係蝕左保費果100蚊,定得到賠償果100萬),而係呢個財富背後帶黎嘅Utility(呢個英文字好難翻譯,Cambridge譯有用性,我個人覺得叫快感傳神D,即係財富帶來嘅快感)。下次繼續講。

Comments


bottom of page