top of page

派息基金,你知唔知賣緊咩野?


呢個星期,又講下派息基金。

事緣,今年加息周期,利率上升,自然就債券價格下跌,係“定劣”黎,無辦法。

最重要,發展到今日,派息基金蝕錢越來越多人知道,唔係話你推,甚至故意隱瞞風險,客戶就會傻傻地信曬,到時候都係做唔到生意,點解仲死都要推??


例如一隻賣得好多嘅派息基金,呢期成日話年派息率高達9%。

但如果你睇真D,基金價格已經從高位跌左26.35%。

呢隻基金其實係投資好多非投資級別(垃圾)債券,根據9月份嘅基金概覽,BBB-評級以下,即係直接D講係垃圾級別嘅債券,佔基金總資產47.18%。


評級越低嘅債券,違約,即係唔還錢唔派息嘅機率就越高。而如果經濟環境好,公司就算評級低D,都做得住,可以派息、還錢,基金投資者就可以賺高息之餘賺埋基金價格升值(呢個基金2019-2021年價格分別升19.49%、21.94%同11.66%)。


但如果以爲過往表現可以代表將來,就真係刻舟求劍(跌左把劍入河,响果個位刻個記號,然後泊岸之後响記號位置落水揾劍,緊係咩都揾唔到)。


今年環球經濟轉差好多,低Rating公司面臨好艱難嘅經營環境,唔還錢嘅違約風險大好多,呢個就係點解好多專業投資者都開始抛售低Rating債券,質低呢D債券(基金)價格,死就死在,好多保險同行竟然叫客戶撈底接呢D人地唔要嘅熱火棒。


從另一角度睇,根據Standard & Poor 2021年的報告,從1981 ~ 2021年嘅數據顯示,評級只有BB(垃圾債券最高果級)嘅公司,3年内違約嘅機會率已經達到13.5%,即係你賣7隻呢D債券,就有1隻會收唔到利息甚至本金。如果再低一級B級,3年違約率就有57.3%,即係2隻就有一隻。


呢個數據仲要係40年嘅平均,包括有經濟好同經濟唔好時期,如果未來1、2年預計經濟衰退,違約率理論上會比呢個平均高好多。


網上揾到另一間評級公司Moody’s 嘅2010年報告,統計由1970-2010年40年時間,但用一個Weighted嘅計算辦法,Ba(相等於BB)同B嘅3年違約率,分別係5.6%同16.3%。


所以話,呢隻基金,有一半買落呢D垃圾債券上,隨時有一個大比例收唔返利息同本金,而家話派果9%固然凍過水,如果債券連本金都攞唔返曬,基金價格可能進一步下跌,你仲敢唔敢叫個客“撈底”、“收息”??

コメント


bottom of page