top of page

最新銀行保融行情


上星期脫左一期,因爲實在太忙,呢個世界就係咁,呢野一係唔黎,一黎就幾樣一齊黎,搞到你得閑死唔得閑病。


首先,搞左好耐嘅物業活化,終於計掂曬D數,真係可以Launch,吸引到一堆業主就緊係預期之内。但呢個產品,好嘅地方係可以做到好大嘅單(過百萬美金),但唔好嘅地方就係都真係幾煩,條數真係要計得好仔細,而且涉及私人銀行開戶(KYC程度比買份保險麻煩10倍),同涉及多個金融產品互相配合,就算Sell到客戶點頭,之後逐步執行,都要搞幾個月,一堆野要做。


另外,期待數年,中港終於開關啦。好多大陸客戶等左幾年,積壓一堆購買意願,都想儘快過來辦好,資產國際化嘛。既然共同富裕係國家政策,當然選擇黎香港富裕,錢有保障,自己保持富裕之餘,又俾D錢我賺,我都富裕下,好過留响大陸果種富裕嘛。我黎緊星期一,應該就會簽疫情以來第一個大陸客,希望順利。


最後,就係今日想主力講下果樣,因爲加息周期行到尾聲,保費融資套息操作又返番黎。事實上,一個月HIBOR(好多按揭同保單貸款嘅基準利率)由上年尾最高過5%,跌到最近見過2.12%(行文最新2.34%)。


尤其係呢個時候,市場上仍然有之前高利息而逼銀行減價嘅超筍Offer。例牌唔開名(佢地又無俾廣告費我),但做開保融,一講大家都一定知道。呢間銀行而家Offer緊H+0.6%,留置10萬港幣,如果留置夠100萬,仲H+0.4% tim。


如果大家之前都有做開保費融資,就會記得,保單質押利率市價一般都要H+1.5~1.8%,個別私人銀行因爲標榜做大客戶(順便有其他投資生意),做到H+1~1.3%,已經講到係超級優惠。


所以之前做落嘅貸款,H升到5%,再加1.8%,咪成6.8%,搞到好多人蝕錢,所以咪個個都話要做有P Cap果D Offer,但其實P Loan,都唔係真係咁筍,整體而言,H Plan,有無P Cap都好,其實都係So好多,不過係另一個題目,之後講。


高利率呢樣野,大家都唔可以改變(除非你係聯儲局主席),我地唯有改變自己去適應時代,銀行都無例外。所以當時候,果間銀行就選擇賺少D,將自己個Spread減到去0.4~0.6%,就算H高,一加一減都希望可以保留到一D生意可以做。


但市場不斷變化,過完年,港息已經明顯回落,但銀行Offer,注重企業形象(唔可以朝令夕改,唔似得香港政府),之前個筍Plan暫時仍然有效。以而家利率水平,2.34% + 0.4%,都係2.74%,比一般P-2% = 3.875%,低好多。


所以,呢一期,我(同叫我D Sales)都Call返曬D客,講返呢個道理,叫D客把握呢個尾班車,Lock住低Spread Offer,就算HIBOR稍後波動回升,有短時間挨貴息,咪頂籠幾個月最多1年鬆,但之後十幾年都可以享受一個低Spread Offer,壓低利息成本,咁樣先係賺最大幅度嘅利息差。

Comments


bottom of page