另一樣呢一代危疾產品嘅特點，就係要針對例如新冠肺炎呢D死得人但你又好難加埋入危疾名單嘅病。
之前如果有客戶買左危疾，過去幾年真係中左招，入埋隔離病房，插曬呼吸機，半隻脚企左去鬼門關都好，真係死左都算，賠身故賠償，但如果康復出返黎，就算話有咩野長新冠手尾，但因爲新冠唔算危疾，所以一毫子都唔會賠。
於是有客戶就會覺得買左危疾都無用。
但另一邊，就算呢一代產品特別加埋“新冠”都無用。一來新冠唔係一定嚴重，尤其到後疫情嘅今日，仍然有朋友都會話自己中招，但99%都只係輕症，同傷風感冒無分別。如果傷風感冒都要賠，保費肯定貴到天價。
二來，大家擔心唔係新冠包唔包，因爲已經係過去。大家擔心係下一次唔知係咩野大流行，新乜新物，根本預知唔到係咩野病。
所以，呢一代新Plan，都各出奇謀，有不同方法去填補呢個保障漏洞。
譬如，有公司就加“深切治療”入危疾種類之一。唔理咩野原因，新冠又好，下次新乜都好，總之受保人入ICU 72個鐘頭（3日），就賠20%，如果夠120個鐘，再加要做指定複雜手術，就賠足100%。
呢個條款（病種）將危疾保障推到接近醫療保障，因爲賠償條件，已經由患上指定疾病，發展到不問病因，只需要有接受治療就賠。
另一個角度睇，已經由百幾種指定疾病，變成無限咁多種病都包，只要病情係嚴重就有得賠。而咩野叫嚴重？就係需要入ICU接受治療。
Comments