top of page

晉升途徑 - 中介公司負責人員


好多從業員,無論係入保險公司做Agent,定好似筆者入Broker做,入行時候無論係自己本身就有想法,定比上綫Mo到有呢個想法,心裏都一般計劃過幾年有D數同掌握到一D Selling Skill後,就可以升做Manager,帶人Build Team,食Override。


不過帶人一D都唔容易,一方面好多人唔一定生性,你Mo得佢黎,有時候自己跑仲簡單直接,二來要人家真心服你,你要Lead,唔係管“你”,尤其如果後生D果陣時,人生經歷不足,真係唔容易做Leader。


所以,除左帶人Build Team之外,做呢行會唔會有另外一條晉升嘅Path?其實可以考慮做保險代理或者保險經紀公司嘅負責人員(Responsible Officer)。


根據保險業條例,呢兩類保險中介公司,都需要有最少一名RO,簡單點諗,好似睇戲,差人落酒吧查牌,第一句就係,邊個係持牌人,然後阿鄭伊健(陳浩南,古惑仔嘛)就會行出來話係我。其實保監局一樣有呢個權,隨時上黎做Audit,雖然場景肯定唔會咁戲劇化,但想講就係,好似酒吧同其他受法例監管嘅行業一樣,保險中介都要有一個負責人,負責管理成個保險中介業務,尤其合規。


咁做RO有咩野好處?首先當然就係有一份糧。而家市場價格,Broker RO一個月,都最少3萬,呢個價錢Suppose係唔使返工,净係負責牌照、合規同保險公司關係三樣野,其他銷售同行政工作,入單,Filing之類,另外請人做。


所以,好多人做左RO,每個月净袋3萬蚊之後,繼續如常跑數。唔係有呢邊無果邊,而係加上去,兩邊都賺埋,更重要係有一個底,如果有家庭嘅從業員,無論男好女好,有一個穩定收入,都係對家庭一個承擔。


當然,3萬只係一個起點,如果工作責任超過上述果3大範疇,例如筆者當年,係成間保險Broker嘅真正負責人員,即係我上面果個(集團管理層),就真係一D保險野都唔識,所有野,都係我搞掂,一係我落手做,一係我請人教佢做,總之我負責搞掂同交數。啱啊,公司係有客源,但有客,唔代表佢地會自動自覺排隊簽單,要人Sell㗎。我就負責請Sales,Training,同keep住教育老闆,客戶唔會自動自覺簽單呢個事實,唔好以爲集團有客源就大曬。


所以我當年一個月人工都7萬,年尾仲有花紅,炒埋成130萬一年。


(雖然,而家好多老闆未必願意出呢個人工,因爲就係果樣,以爲有客源就自然有生意,唔使揾人統籌點樣做業務,所以我都唯有自己做老闆,另一個故事啦。)


做人,緊係要睇眼前脚下,否則好容易仆親;但有時候久唔就都要擡頭睇遠D,否則3年又3年,10年過去你發覺自己都係原地踏步,唔知自己做緊咩野就唔好啦。


Comentários


bottom of page