又接近稅務年度終結啦，正路又係Sell QDAP嘅好時機。但扣稅年金呢樣野都做左好幾年，有需要做嘅客，例如稅率Hit到17%嘅人，應該一早已經做曬，今日仲講，有無Market？？
保險公司内部例牌會出D報告，話其實都仲有幾十個Percent打工仔未做QDAP，鼓勵下大家去跑。但事實上，真係出去Sell下，又發覺個個都做左，邊有報告講到咁多人未做。
原因好簡單，呢D未做嘅打工仔，其實很可能根本就唔會做，例如屬於比較低收入人士，稅率本身就不高，都扣唔到咩野稅，比你揾到都Sell唔到，所以統計數據就係數據而已，要識得睇。
要發掘有效市場，我地要先搞清楚方向，唔係隨便揾未買嘅人就Sell。首先一類真係可以開發嘅市場，就係之前收入唔高所以未買到儘嘅客，例如計過自己要交12%（第二級）嘅收入只有3萬，而下一級稅率只係7%，未必值得做QDAP（要知道，如果唔係可以扣稅，一般QDAP嘅Return真係令人唔係好開胃）。
但今年情況有變，例如揾多左錢，尤其後生一D嘅客戶群，就算呢年環境唔好，無人工加，但好多人移左民，上面有空缺，就有機會升職。升一級，當每月人工加3千，一年都3萬6，如果之前只做左3萬扣稅額，今年就好應該做多3萬，攞儘6萬嘅扣稅額度。
但呢D後生仔，其實好多連一DD扣稅年金都未必有做，因爲雖然話可以扣稅，多多少少做D，扣到無17%都可能有12%。但係做左落去年金，要好多年先可以Breakeven走得，如果要到原本產品設計嘅收成期（理論上先攞到比較好嘅回報），就最快都要到50歲（法例規定）。
可以扣稅，但要鎖咁多年，而且年金回報真係低，真係唔係好受後生仔歡迎。
亦所以，如果你口袋裏面有產品可以滿足到呢D客戶嘅需求，之前未做，反而係最好嘅Market。
最近有公司針對呢個市場，推出一隻全Guarantee嘅QDAP，本身就無咩特別，5年供款計劃，都要第8年先可以Breakeven，符合保監局話唔好太早比人扣左稅就Breakeven走人，無左鼓勵人為退休準備嘅政策目的。
但係，如果一次過預繳曬5年供款，因爲預繳部分有保證利息，而且最近做緊首年保費15%優惠，例如6萬年供，5年總保費30萬的計劃，其實只係俾274,300就可以，而到第6年，保證退保價值已經有277,751。
固然儲錢退休係重要，但對一個30出頭嘅後生仔黎講，眼前揾筆錢買樓上車結婚可能更重要，如果手頭上已經儲左筆錢（例如20萬，最低總保費）準備俾首期，放入呢個計劃裏面，起碼頭5年可以扣稅，而到第6年如果要錢買樓，都已經可以隨時離場。
大家不妨睇下身邊有無呢D之前嫌年金太長綫嘅客戶，話唔埋又係一堆生意。
Comments