呢個話題，其實都講過好多次，無奈，最近又見到好多基金公司去保險公司推呢D派息基金或者高收益基金。真係又要出黎提醒大家一下。
我再次强調，呢D根本唔係“派息基金”，尤其有6%以上派息嘅，其實係“垃圾債券基金”，裏面D債券好大部分係BB或者以下嘅低評級債券，有好大機會隨時違約，唔還錢。而且，更加唔好以爲，上年呢D基金跌左好多，趁低入市，應該風險有限，但睇返經濟周期，未來1、2年先係呢D基金最大鑊嘅時間。
早兩個星期，美國銀行策略師出左一份報告，預期未來1、2年，會有1萬億美元企業債券違約。更得人驚係報告話，就算經濟比預期好，呢2年挨得過，無爆，都只係挨咋，唔代表解決問題，呢個鑊拖落去，仍然會爆。
當然，報告無特別指係垃圾債券，只係籠統講企業債券，但正路黎講，肯定企業信貸評級越低，爆煲機會越大。唔係話高評級債券一定唔會爆，而如果未來兩年企業債券高危，經濟唔好經營環境困難，中間有1、2隻大企業出問題都唔奇怪，但如果有1、2間大企業爆煲，肯定可以講，其他細公司肯定已經血流成河啦。
事實上瑞信之前都出左問題（留意，瑞信最後由瑞銀接管，除左AT1債券出事外，技術上瑞信唔係執笠）。但美國幾家出問題銀行，就全部係中小型銀行。所以話，如果真係有一輪倒閉潮，無可能高評級企業出事，而低評級公司反而無事。
火頭，一定由下面燒上去，燒到幾大嘅企業都出問題，就睇客觀環境有幾壞。事實上，高評級企業嘅意思就係財雄勢大，就算環境差D（生意唔好無錢賺，而發債利息又高左），都夠錢挨一陣。但同樣環境，實力差D嘅公司，已經大批倒閉啦。
呢一期金融界都講緊企業倒閉呢個問題，尤其經歷過年頭幾間銀行爆煲，大家都好緊張，投資債券都好小心，高評級果D都要研究清楚，垃圾債券更加唔好搞。唔係話一定爆，市場嘅野，真係估佢唔到，但風頭火勢，無理由呢個時候反而跳落去，真係出事，好難解析。
真係做開投資嘅顧問，都開始避開呢D基金。於是基金公司唯有Target對投資少D認識嘅保險中介同銀行RM，改個名叫高收益債券，然后包裝下，話基金好有策略，又股又債，其實進可攻退可守，博大家唔識。所以大家真係小心D。
Comentarios