top of page

如果經濟衰退,會唔會好難賣單?


最近,全球多個國家都話要加息壓抑通脹,而加息,就好有機會令到經濟陷入衰退。而香港作爲開放型經濟,再加上防疫措施遲遲未鬆綁,前景真係唔樂觀。


經濟差,就各行各業都艱難,但我就無咁大愛,唔係話唔關心社會,但肯定關心自己有無生意做多D,再直接D,會唔會難賣左單?


其實我入行廿幾年,都經歷過經濟唔好,例如一入行就撞正2000年科網股爆破,2003年沙士,然後08年金融海嘯,個個唔好話加人工出Bonus,分分鐘失業tim,點同你做Saving Plan。當年又啱啱開始强積金半自由行,D公司做推廣,轉一個個人賬戶,除左佣金外(其實好少),再每個Case唔理大細,送$100百佳禮券,我連呢D都跑,都攞到四、五十張,幫補下日常柴米油鹽啦。


今年形勢,會唔會又係咁樣??唔使估,我都幾肯定會(除非唔係)。

不過,又唔使咁灰。只要你生意定位改變少少,其實反而可以做多好多生意。


如果你一直做開,都係靠客戶每個月收入黎供嘅Plan,即係FNA計Affordability睇保費佔每月收入幾多果種,未來一段時間你真係會好難撈。


D客都無人工加,Bonus又無,如果咁啱係做飲食同康泰旅行社,就連份工都無埋,而物價又加完再加,你點叫佢地買多份醫療?啱,同意醫療保障已經係接近一個必須品,但病只係一個機會率,反而餓死就逼在眼前。儲錢退休、比個仔讀書、危疾保障,就更加遲D先講。


其實你可以轉變下思想,諗下計“作”D客之前儲落嘅錢(我知呢個作字好難聽,但又真係好傳神啊)。客戶每個月都唔夠使,“供”就真係無能力,起碼無心情,但香港地,成日都話D人有錢,好似早幾個星期見到篇報道,唔知真定假,話呢排香港樣樣輸新加坡,但人均財富,就要好多年先可以追過。


儲蓄,固然如果最近唔掂,都要留一D做應急儲備,無可能做曬Saving Plan。但扣除應急儲備之後嘅真係閑錢,在自己可以接受嘅風險程度内,爭取高D回報,就肯定每個香港人日日都諗緊。而最近形勢,恆指連15000都守唔住,加息連債券基金都大跌,樓市又要消化移民盤,儲蓄保險好似變到成爲唯一有正回報又穩陣嘅工具,比以往任何時間都好sell好多。


而且Saving Plan係一個講法之嘛,唔係一定要“Saving”,一筆過供款都有(雖然嚴格應該唔叫Saving Plan,但名字唔重要),就算分2年、5年,都可以拆開儲落筆錢供入去,甚至2年、5年供款一次過Pre-Pay,預繳部分仲有保證利息tim。如果接受到風險,可以做保費融資或者增大按揭,杠桿紅利回報。


所以,未來一段時間,大家要學多D幫客人現有財富增值嘅戰術,如果仲净係賣“保險”,同叫人儲錢,應該都會幾難做。



Comments


bottom of page