呢1、2年，好幾間保險公司都推出左標榜多元貨幣嘅Plan，應該因爲香港人呢幾年開始認同國内同胞嘅智慧：錢，要放外幣先係錢，外匯管制呢家野，唔怕一萬最怕萬一。
於是我都聽到好多Agent同我講，而家成日Sell客，如果對港元無信心，緊係做份多元貨幣，第日有咩野，隨時轉貨幣，就算香港融入祖國，一體化外匯管制，都唔驚。
但係，我呢D讀金融嘅，對錢呢樣野嘅虛幻真係好有鑽研，就真係諗唔明可以轉Plan Currency呢樣野對客戶有咩野好處。
而家，So Far So Good，香港仍然有資金進出自由，外匯兌換都無任何限制。買一個港元Plan或者美金Plan，真係攞返筆港幣或者美元，如果真係有需要轉外幣，例如移民或者留學，隨便邊間銀行都可以做到，網上㩒個掣就即刻搞定，㩒多一下，匯埋去海外戶口都仲得。而匯率方面，從來保險公司果個都唔抵，要攞錢攞外幣，使咩靠保險公司？
當然，大家驚嘅唔係而家。如果有一日，港元同美元脫勾，或者乾脆同人民幣挂，到時個Plan Mature攞返一堆港幣，可能換日圓去旅游都唔得（因爲外匯管制），點算？緊係今日做份多元貨幣，到時候攞美元又得，如果個仔移民左英國，佢攞英鎊又得，澳洲就澳元，加拿大就加元，去左法國，攞歐羅都可以，咁就唔使驚。
但，事實係咪咁？
我地假設外匯管制唔會搞到保險公司違約，今日應承你可以轉Plan Currency，攞錢時真係會俾返果隻貨幣俾你。但咩野係果隻貨幣？要知道，貨幣係一個概念而已，唔食得唔著得，唯一嘅價值係可以買到食得著得嘅野。
保險公司唔會叫你上去公司，然後俾一箱銀紙你，你估做戲賣白粉咩。實情係你净係收到保險公司一張“外幣”支票，而如果有外匯管制，你只可以去香港嘅銀行存入呢張支票，而且唔可以兌現金，只可以變為你戶口外匯存款嘅一個“數字”。
上年有一位北京老闆同我講，其實佢地响北京都可以做到美元存款，唔係我地諗到咁呀。於是我問佢，你有咁多美元存款，你可唔可以得閑攞D出黎擺屋企？得，同外管局申請，批准咪得囉。匯去你個女响美國個戶口？可以啊，申請囉。你可唔可以用呢筆錢去Amazon買野？啊。。。。。
咪就係囉，你戶口嘅美金，都唔用得，算咩野錢？唯一可以做嘅，就係轉返人民幣，咁算咩野外幣？？純粹你有一組數字，然後話比你自己聼，安心D而已，你無真係有外幣啊。
所以話，呢D多元貨幣，如果香港維持自由，轉Currency呢樣係多餘；如果未來有管制，As Long As保險公司係香港公司，出張支票無論咩野貨幣，都係香港境内嘅野，話你知係咩都好，都係一組數字而已，無意思。如果真係驚，唔係就咁搞個多元貨幣Plan，而係要真係做個境外保單先得。
Comments