過去幾年，好流行做保費融資套息嘅產品，但最近，美國開始加息，雖然好似暫時香港利息未跟隨上升，但港幣同美元挂鈎，香港加息係遲早問題。當客戶每個月要還多左利息，增加左成本，自然回報就少左，吸引力減少，就越來越難賣。
唔通要賣返1千幾百美金，人壽、醫療、危疾、意外全包果D計劃？
（我真係睇到好多Agent仲日日Sell緊呢D單，好慘。）
我成日話，只要你識賣，唔使一定要識有錢佬先可以做到大單，一個普通中產客，都可以做到起碼似樣嘅生意。
呢十年八年，因爲香港樓價高，時不時聽到有老竇老母會買層樓比個仔，就算唔係Full Pay，都起碼首期，然後阿仔阿女繼續供。呢個當然睇到親情偉大，但我地作爲Sales，雖然唔係做地產，但有無嘗試去理解呢個行爲背後嘅心理？記得我曾經講過，一個成功Sales，唔會净係望住自己公司嘅產品，而係將個中心放係客戶身上，個客戶有咩野心理、想法？我可以點樣滿足到佢嘅需要，實現到佢嘅願望？
既然成層樓都可以買比個仔，為下一代留一筆大錢，又有無得諗？
阿咩太（啱啊，慈母多敗兒，阿媽通常容易Sell D），我有一個Suggestion，如果話今日你拎26萬港幣出黎，做首期買份Plan，然後之後每個月供3-4千蚊，好似供樓一樣，不過銀碼唔使咁大，然後你一日百年歸老，就可以留一筆好大嘅錢比個仔個女甚至個孫。
例如10年後（假設個客40歲），有827萬（其中634萬保證），60歲就968萬，80歲老實講應該係中位數，就1,221萬，你有本事到120歲，成4,171萬tim，但你今日只係比26萬出黎。
每個月果幾千蚊，呢10年，就你供，到個仔出黎做野，就佢供，反正佢都要儲錢，但平常一個儲蓄計劃，每個月幾千銀，點可以40年有千二萬？今日，26萬你又唔係無，幾百萬都攞左去比首期啦；放响度，都係白蝕利息，不如做個安排，幾十萬變過千萬啦。
當然，講就容易，揾到一個Buy呢個Concept嘅客就唔容易，但記得，呢張單係講緊22萬美金保費，成173萬港幣，我派比Sales起碼7%（Agent大概4%啦），佣金成12萬。撞正個客唔Buy，净係要短期回報，咪Next囉，但你次次講下，一年有幾個Buy你，你諗下會賺多幾多？而且個人都做得開心D啦，唔使做黎做去都係D蚊型單，自己都睇小自己。
無偏見，但真係實情，我聼出面好多Agent同我講，邊有教Sell呢D大單。最叻就係叫你吼住D朋友生B，然後Sell個子女計劃，最緊要加齊意外、醫療、危疾Rider（我超過9成9單都唔加Rider的，煩），加埋都係1千幾百美金。仲通常客戶聽到你約出黎講“保險”，都借口話唔得閑。
所以，呢個世界好大，好多好好嘅Selling Angle，關鍵係你有無走出黎睇下，定成日比個Team洗腦，乜心態強就可以唔使食飯？？
Comments