個個禮拜都講保險（緊係啦，保險從業心得，唔講保險講咩野？），今個禮拜講一個General D嘅做人道理（所以，保險從業，都係人生嘅一條路徑，都算有關係）。
American Dream好出名，Hong Kong Dream係咩？其中一個，肯定係發達，而且最好係不勞而獲，中六合彩就係最代表作。
八十年代，肥肥同董驃果幾套富貴逼人就係用中六合彩做起點，帶出好多香港獨特嘅文化、心態，如果你太後生，可能真係未出世，但揾返黎睇，幾十年後今日你都仲可以好有共鳴，因爲好多内容唔係潮流，而係我地香港人嘅核心價值（呢個用字今日已經好老土，但我真係諗唔到第二個字眼），係好係唔好，都係。
個個都想中六合彩，究竟點樣先可以真係中到？有D人會話係命，命裏有時終須有，命裏無時莫强求。有D人話其實係風水，年頭使幾萬蚊請個風水師，屋企擺個催財陣，過年後自然會中。
但我就話，要中六合彩，第一件事就係。。。。首先，你要落街去買張六合彩飛先。你睇下富貴逼人阿驃嫂，買親都一叠，先有機會。當然，我唔係話叫你學佢沉迷賭博，其實要中，一張就夠（我的哲學）。
但要中，必要的一個條件，就係最少你要手上要有一張六合彩飛。就算阿上帝/觀音/黃大仙（Depend你的信仰），話你知，你命中注定聼日會中六合彩，但你以爲神力/佛法無邊，話左係就係，坐响度連落街買張飛都唔落，我都好難想象阿上帝/觀音/黃大仙，就算點無所不能，點樣令到你連飛都無都可以中六合彩。
（當然，其中一個設想係，就算無自己買，但有人跌左張飛响你門口，咁啱又中左，但就算咁，你都要出去開門，踎低去執。寓意一樣。）
有時候，人生有順境逆境，時來運到（有D人就堅持係因爲年頭擺果個風水陣），唔好講中六合彩咁極端，但遇到大客、爆數，所謂事業運到，都好平常。但係，如果你年頭走去批大運，阿算命佬（收你幾差野之後）話你今天正財運旺，你就真係以爲掂，唔Call客，就算有客戶Walk In揾你，都唔見，點發達？
最後，想講下富貴再逼人（即係第二集）嘅結局。話説阿驃叔佢地最終發覺原來張加拿大六合彩仲有效，即係發達啦，個餐館老闆問佢地，咁你地聼日仲黎唔黎開工，阿驃叔話，緊係黎，唔做無發達㗎！
大家記得，唔做無發達㗎！
Comments