傳承、信托，真係做到多D生意？？

點解有呢個話題，因爲果日，我講Webinar，教利用大額人壽去留一筆大錢俾下一代，而雖然話大額人壽，但其實Minimum俾幾十萬港幣都可以入場。

係，我係有客做一千萬美金，但大客可遇不可求，邊有咁多大客，所以通常講得，要有實操性，希望大家真係有機會做到生意。幾十萬都已經可以入場，身邊就容易揾到合適客戶。

事緣，最後有參加者問，如果呢D保單，要做保費融資，銀行一定要求受益人寫Own Estate，於是賠償會落返遺產，咪會有遺產稅同遺產承辦嘅麻煩lor。

因爲我知道呢位發問參加者，呢期成日去鑽研D咩野信托、傳承之類，所以成日開口埋口就同客戶講要安排好，如果唔係，到時候可能乜嘢都留唔到俾細路。

實情係，香港已經取消遺產稅好多年，而大陸，大大話話吹風話要開徵，都講左十幾年仍然未見落實，所以大陸高淨值客戶都無人真係驚（人性如此，永遠要殺到埋身先會驚），而相信我地一般從業員，遇到海外有機會需要俾遺產稅嘅客戶，機會都好細。成日將遺產稅挂口邊，想點樣引起客戶共鳴？？

而講到遺產承辦麻煩，我唔係律師，不過都有少少法律常識，知道係有情況會搞好耐，例如資產涉及物業，仲要分佈環球多個地方，如果有好多實物，例如珠寶名畫之類，可能更麻煩。另外，如果家庭關係複雜，離過幾次婚，出面幾個情婦（即係二奶），仲生埋仔（即係非婚生子女），最重要，真係多錢，起碼十億八億，爭起產黎，肯定搞好多年。

如果你真係做家族辦公室，我講真果D，唔係吹果D，個個客無十億都有八億，要惡補下呢D傳承同信托法規（如果真係咁，正正經經報一個短期法律課程la），都無可厚非。

但一般Agent，身邊主要客源都係中產，好似我果日主講嘅計劃，幾十萬就可以起步，Target香港中產，如果要傳承，咪就係一個老婆兩個仔女，一層自住物業（如果用長命契，甚至遺產問題都唔使擔心），一份保單賠償（如果真係幫襯買左），一、兩百萬存款、基金、股票之類，去金鐘申請承辦，可能連律師都唔使請。

面對呢D中產，你日日同佢地講信托，講傳承、講遺產配置，我知你自己會覺得好型，感覺自己高人一等，但邊有可能引起佢地興趣。聽我講，無超過1億身家，無人會做信托㗎。

不如Focus返自己面對嘅客戶群，點樣拎幾十萬就留到幾百萬俾細路，或者點樣每年派4、5、6%，呢D話題對中產客戶更直接實用。