top of page

做Team頭點叫人可以服你?


個個入呢行都想有一日帶人、Build Team(直到發覺帶人一D都唔容易,最終都係選擇“獨身”),但未必個個都受到下綫尊重。其實,唔一定話針對性講保險中介行業,放大D無論各行各業,究竟一個領導要有咩野嘅風範,點樣先可以贏到追隨者嘅尊重


有一段時間,有間公司請我做公司負責人員,不過公司另一個高級人員忌材,净係俾我掂行政、後臺方面嘅野,自己霸住銷售方面事情。我倒無所謂,出得起錢(以當時我的水平,好唔錯啊),叫我净係管後勤,唔使Sell,我樂得清閑。因爲客源係公司,銷售唔會有個人佣金,做到生意純大圍年底分紅而已,所以爭做銷售唔係因爲賺佣金,純爭功勞而已。爭功都算啦,但都要你真係有料。做Sales,唔容易㗎。


話説有一次講Seminar,公司自己有客,呢個人負責講,我個人就覺得麻麻地,都唔生動(避免聽衆瞓著),又無説服力。不過都算。大家做開前綫都知道,講完Seminar後,一定要個別跟進,問下客戶覺得點,會唔會有咩野疑問,或者Concern。最後,push一下,因爲人性,要自己舉手話買,好難,但你問到,好啦,都可以嘅,就容易好多。


不過呢個人,講完,就企响度。佢Train出黎嘅Sales,都一樣企响度,唔主動撩客戶傾計,净係等人地行埋黎咨詢。當然邊會有客咁主動問野,結果就係成場Ready Buyer(有其他原因所以一定係Ready Buyer),都做唔到一張單(除左我抵唔到頸,親自撩2個客,因爲當年我普通話唔得,净係敢撩兩個廣東佬,傾落去下晝去左AIA簽2份Forever Love + CEO,不過係大數,無個人佣金㗎)。


我問呢個人,點解你唔帶頭去個別撩下D客傾計。佢話因爲佢係Speaker,係Director Grade,如果落場Sell,會好Cheap,實情就係呢個人,要搶Sales Director呢個Title,但係骨子裏其實好怕見客。大家做前綫,應該知道真係有D人適合做後臺唔適合前綫見客,本身無問題,但就唔好話自己Sales Director嘛。更大的問題係,因爲做阿頭,自己都唔敢上前同個客講,下面D靚,點會奮勇向前?


做將軍,當然主職係佈局、指揮,如果日日自己做Rambo,反而係失職。但就算開槍唔係日常職責,但如果有一個將軍,唔識開槍,仲話做將軍要自己開槍,好Cheap。你覺得呢個將軍點帶兵?打仗時候點叫D士兵衝鋒?


講咁耐,其實係想講,要你嘅Team Member服你,唔係要有房坐,唔係要帶隻金勞,成身碼頭之類。老老實實,當下面遇到一個麻煩客,或者大客,你同佢Case Study下,甚至一齊落場Join Call,然後成功做到,呢個Sales就一世都服你,連帶側邊其他人,都會俾你一個尊重。

تعليقات


bottom of page