做保費融資同保單質押，甚至借錢買樓，都涉及呢個艱難嘅決定。
之前低利率年代，H，即係HIBOR，Hong Kong Interbank Offer Rate，銀行同業拆息，長期低於1%，無論保融定樓宇按揭，H+1.3 ~1.8%，實際貸款利率好多時候甚至低過2%，而Prime Rate穩定企响5%，就算減2.5%，都好難低過H Plan，所以好長一段時間，大家都習慣揀H Plan。
但呢幾年加息，H不斷上升，上年甚至見過5%，雖然P都有上調，但係幅度細同有序好多。部分無“P Cap” 嘅貸款，最高H+1.8%，實際就係6.8%，貸款人都真係好慘。
所以，好多“馬後炮”評論就突然跳出黎，話叫人去借無“P Cap” 嘅銀行好無良，因爲如果有“P Cap”，H升嘅時候自動轉“P Cap”，如果係P-2.5%，就算P加到6.125%（我見到而家有銀行係呢個水平），都係3.625%，好好多。
搞到而家，無論係做保費融資，定做樓宇按揭，客戶第一句一定問，呢個Offer有無“P Cap”先？當然，我成日講，作爲客戶，隨波逐流，係攞正牌嘅，但如果你作爲專業金融從業員，你就一定唔可以憑直覺人講你又講，要客觀同有理有據。
究竟今日做貸款，應該揀P Plan定H Plan？
首先要搞清楚，我唔係討論有“P Cap”好定無“P Cap”好，呢個係廢話，如果同一個H Offer，多一個“封頂”條款，當然好過無，萬一利息有波動，可以“輸打贏要”。
我係講緊，只能揀H或者P是但一個（而家不少銀行的計劃都係咁），或者無“P Cap” 嘅計劃優惠好多，例如H+0.6%，同H+1.5%但P-2.5%較低者爲準。
呢個情況，因爲之前H飆升嘅記憶歷歷在目，心有餘悸，我見過好多人都會第一時間話，H+0.6%好抵，但無“P Cap”，風險好高，如果H又升返5%，就算+0.6%，都5.6%，高過P-2.5%好多。
永遠記住，我地唔好净係睇到眼前利益，而係要顧全全期收益嘅最大化。
諗深一層，P Rate固然升得慢，但調轉頭講，都跌得慢。H上年見過5%，但今年2月，又急跌到最低2.14%，而同期P無變過。如果H+0.4%（有Offer試過），實際利率只係2.54%。又比P Plan低好多。
所以，關鍵唔係眼前呢個Moment邊個低D，而係未來10幾年，平均邊個Plan會低息D。咁樣諗就清楚好多，P Plan其實係呢兩年有部分時間優勝，但過去十幾年都輸俾H Plan。
再講，好多人驚左H Plan，係因爲H大上大落，成日就係記得曾經試過實際利率6.8%。但就算咁樣，咪又係貴果一個月，過兩國月咪有跌返去3.94%（H+1.8%），蝕到幾多？
但如果你成日Focus果一個月，走去揀P Plan，係，如果利率突然波動果個月你唔驚，但其他月份，你就都要挨貴過人地嘅利息。賺一個月，蝕十年，你自己話。
所以，就算而家高息時期，只要你個客識諗，都係揀H Plan有著數。可能最初1、2年挨少少，但之後十幾二十年賺返，尤其你趁而家Lock In左一個低Spread H Plan（現時市場最低H+0.6%），呢個先係最著數。
Comentarios