保險從業Old Seafood點解越做越輕鬆？

有好多同行入行嘅時候，上綫都會同佢講，俾心機做，第時升職Build Team，就佢地跑你唔使跑，坐响度食Override，唔使做都有被動收入。因爲一開始就灌輸呢個概念，好多人做左10幾年後就算仍然未能“坐响度食Override唔使做”，都不斷同我Repeat呢個“理想”。

事實上，呢個世界邊有不勞而獲。帶Team，係“佢地跑你唔使跑”，係可以食Override，但肯定唔係唔使做，更加唔係被動收入。帶人，要Manage，更重要係Lead（兩者有乜野分別？有機會另文討論），個個禮拜要做Case Study、Grill（不過今日，有幾多Team Head有做？），仲有遇到麻煩大客，要一齊Joint Call，真係有D做埋比佢嘅感覺。而如果你真係坐响度咩都唔做，慢慢下面就會唔尊重你，初頭可能唔識就無野，之後有毛有翼，點會唔走。

其實，做呢行，要越做越舒服，唔係妄想層壓式等人地跑埋比你，而係Build自己Client Base。有一堆Existing Client，就會做得好舒服。（留意，係做得舒服，唔係唔使做。）不過呢個講法大家日日都講，但係好似好少人會話你知點解有客底會做得舒服。或者有人會話其實道理好簡單，有客底就有Repeat Business嘛。啱，但仍然係一個講字，無一套完整、可以量化嘅計劃。

其實，筆者入行時比較幸運，公司有一套完整嘅培訓課程，包括Selling Skill。公司文化亦要求帶人要做齊Case Study、Grill、Joint Call呢D，唔想做就唔好帶人，由條靚自生自滅其實係浪費緊公司資源（起碼個位好貴）。我地一入行，就會教我地計劃點解要儲客。

例如一個新人，初初做一定難，一個月日日揾客可能都係簽到一張單。但唔緊要，只要堅持落去，一年，你就有12個客啦，逐個客逐個客咁儲，5年後你就有60個客。呢60個Client Base有咩野意義？

有無捻過，你簽左一個客之後，跟得D服務好，年年Review，呢個客平均幾耐就會同你再買第二份單，或者介紹朋友同你買？？1年？3年？定5年？1年可能太過樂觀，但跟一個客5年，佢家庭狀況有變，例如生多一個，要再買一份小朋友危疾，或者升左職加左薪（5年wor），儲多D錢退休，都好正常。

如果平均一個客隔5年就會比Repeat Business你，數學上就係代表每一年，你就有1/5客戶會同你再買。如果你有60個Existing Client，就代表你一年可以預期响呢60個客裏面可以Generate到12張單。你本來做緊一年12張單，但係加埋呢D Repeat Business，生意就會翻倍。到10年後，有120個客，你就一年翻單都24張，加埋自己Selling Skill越黎越爐火純青，就係點解有我地所謂嘅Happy Agent - 平日唔使點做，只係見下客，就一個月幾張單。有D女士，就係咁可以抽多D時間放响屋企同小朋友身上，仍然可以賺幾萬佣金一個月，其實都好爽。

不過，再次强調，只係做得輕鬆D，唔係不勞而獲。要有Repeat Business，一定要不斷服務得好。所以，大家知道點做啦。