上次講到，有條AgentTeam出黎自己搞，租左個Serviced Office，幾個人租兩個位（間房第三個位我另一家公司頂埋，雖然理論上都係要share一間房，但都叫自己人，唔係三唔識七），同一個夠放部影印機嘅位置，成座個隻，大家其實大部分時間都出左去見客，輪流返黎做野，都夠坐。一個月7千幾，盡量壓低成本，但自己開賺到嘅佣金，比Agent嘅Rate，一張Minimum保融，都差6、7萬。
我呢D十幾年前已經出黎搞公司嘅人，其實感觸好大，世界真係變左，所以我而家日日同自己講，做人，尤其我呢D四字頭，啱啱夠資格叫Old Seafood，如果唔與時並進，成日净係識講“舊屎“（好臭果隻），好快就會變左廢老，阻左世界進步（唔信，你睇下香港）。好彩，廢唔廢，唔係睇你年紀，而係睇你嘅思想。
以前（其實都只係十幾年前），開公司要租Office，租金就唔使講，仲要管理費，裝修都一大筆，傢俬就算大陸訂落黎都一筆，仲要煩收貨安裝，電腦、WIFI、寬頻、電話綫（呢個我真心覺得今日真係無需要，我屋企無電話成十幾年啦，之前打工，公司有比個枱頭我，但識我都知道，千其唔好打我枱頭，保證無人聼），樣樣都搞一餐。最後，連裝個電制，我都自己做。啱啊，應該等注冊電工做，但講真，又真係唔係駁綫，只係個座粒螺絲漏左上，Call得師傅，自己都一分鐘搞定啦。
筆者2013年租嘅辦公室，仲有排搞！
呢D都算，最大鑊係，租約一簽要簽2年。我成日話，D人成日話做生意要控制成本，其實做生意，要控制嘅係風險先真。如果肯定賺到錢，使錢有乜所謂，只要唔超過收入，賺多賺少都係賺，如果你肯定真係賺到的話。。。。最怕係都未知有無收入，已經要頂出黎嘅錢。我知開得公司緊係有信心，但有信心唔代表保證，一日未見到D錢返黎，一日個心都係忐忑。自己租Office，上期、按金、裝修、傢俬、電腦、寬頻，幾十萬閑閑地，仲要一搞搞1、2個月，你可以話我地呢行，個Office裝修緊都可以開始跑數，但你咁多野同時煩（通常仲要同之前份工計清楚D尾數），肯定會影響到跑數。
一租要租兩年，就算你租果日有信心，但做生意風險嘅野，做左一年半年，突然有D你預計唔到嘅事（例如疫情），點算？就算你疫情下自己仍然有D數，唔使餓死，但本來以爲環境好，可以1年擴充到10個Sales，而家咁大個Office，得翻你地幾個Partner，租就照交，就算唔使死，都賺少好多啦。
調轉黎講，如果第一日太過驚死，好似而家疫情環境唔好，真係租3個人Office，過得一年，環境大好（希望啦），個Office唔夠用，真係唔知點算。
Serviced Office 就靈活好多，理論上，一個月通知就可以走（所以聽講過年果時，疫情環境唔好，好多公司都退租），就算要攞Discount，都係簽1年約，風險有限，起碼唔使比一筆裝修費。如果請到Sales唔夠地方用，同Centre講下，只要佢地有位，換間大D嘅房，租都係照交，通常都無咩所謂。
Comments