今日，換下口味，唔講點Sell，講下點樣經營。因爲最近幾年，Remote Working、CoWorking，同Serviced Offices，都越黎越成爲潮流。呢個其實都好大程度改變保險中介行業嘅經營模式。
可能你會話，我個位公司比，租邊度同點租，都唔係我自己話事。啱，如果你捻住一世做最基層嘅Agent，呢D野，真係唔關你事。但如果，你覺得有一日，你會更上一層樓，例如自己帶一條Team，同公司講Branch Out，無論係公司名義租Office，定你自己掂，再或者你乾脆同公司講，開一家獨立Agency，都係賣番公司野，甚至自己出黎搞間Broker（雖然有D踩界，但事實上，好多Agent大頭，自己或者老婆都有另外一家Agency或者Broker，兩邊入數），就算最低程度，自己出黎挂單，攞一個高Rate（比Agent Rate高2~3倍），租邊度同點租，就係你要捻嘅其中一樣野。
香港租金冠絕全球，就係人都知。Agent Rate低，當然一大部分係因爲上面有多層上綫，但無可否認，保險公司（或者Team頭其實同公司有協議，要孭成本）提供個位，仲通常都唔會太樣衰，羊毛出在羊身上，自然就會影響個Rate嘅高低。享受一個舒適嘅工作環境，自然就要有付出，無話啱唔啱，關鍵係你自己嘅選擇，要個位，定要多D錢（差別唔細，香港租貴嘛）。
啱啱舊年，我就幫一條Agent Team 出黎搞間Agency，都係賣番自己公司產品，Minimize改變，但條數就兩回事。之前Agent對保融產品個Rate，得3.2%，做一張140萬（保融最低額度，個客自付32萬），得果4萬幾，就算加埋Quarterly同Annual Bonus（如果攞到），都係多幾千。但自己開Agency，同一款產品個Rate就7.92%（仲要唔係最高果檔，啱啱開，點可能一開始就最高），總佣金成11萬。
當然，呢11萬係Gross，開自己公司就自然要自己孭成本。香港做生意，租金肯定係最大果個Item。10年前（2012），我地開檔，响尖沙咀廣東道租個Office仔，都幾萬一個月，而最麻煩就係要自己再洗一筆裝修費，仲要簽2年約，都好大承擔。
今日呢間Agency，响旺角地鐵站樓上一間Serviced Office Centre（老實講，個門面唔差），租個房，兩個位幾個人Share，一個月都係7千幾。最重要係唔使自己煩裝修，比錢，入去就有枱有凳有WIFI（唔好睇小，之前要自己整成個電腦同上網系統，都煩到死）。想搬，一個月通知就可以。
一個月租金8千唔使，一張單佣金分別都成6-7萬，仲要幾條友，唔會夾埋都係做到每個月一單生意啩？呢條數，係人都識計。所以班友，都好開心。做呢行，跑數緊係首要，但有時候，自己籌謀下，都重要啊。
Kommentare