之前講到，FB上有好多關於保費融資呃人（起碼係誤導）嘅Post，偷換概念，竟然講到年回報可以有22%，因爲用單息計算，又將本金講成開支，利息又講到可以拖到10年後先扣數。實際上，修正呢兩個荒天下之大謬後，年回報就跌到只有10%。但未完，仲有一堆錯處、問題。
第一個錯處，修正後其實會調高回報率（我有碗話碗有碟話碟，唔係一味踩，當然，計數，計高左，係揾笨，計少左，都係錯）。利息開支肯定係本金，因爲唔係可以同銀行講，到10年退保時先扣數。要先攞出黎嘅，by definition，就係本金。但調轉講，利息亦唔需要第一日比曬，係每個月比。換言之，第一個月嘅利息，當然要計足9年11個月成本，但之後就越來越少時間，到最後一期，理論上甚至可以講成真係扣數（實情如此，不過因爲相對細數，影響不大）。修正左呢個問題，年回報會輕微上調到10.37%。
如上圖，首期嘅78萬， 每年10.37%複息10年，應該會有209萬，然後首次利息5,483，每年10.37%複息9年11個月，就係14,590。如此類推，每一個月嘅付出，都會有一個10年後嘅價值，所有未來價值加總，就係321萬，剛好等於當年退保價值減去欠款（即係得回嘅净值），所以我地話呢個保融操作有10.37%的複息年回報。如果10年後得到嘅實數，少過321萬，咁就代表年回報無10.37%。
有10.37%，已經算非常好嘅回報啦！就算我地唔好信個Post咩野22%嘅鬼話，自己心水清計清楚，雖然實際係聲稱嘅一半，但10.37%，邊度揾？係唔係代表呢個係好投資？係嘅，我從來覺得保融如果清楚明白背後風險，的確係好投資，不過呢個10.37%，仍然係有誤導成分，背後仍然有好多亂黎嘅地方。下次講。
Comments