呢個星期懶D，抄下功課就算。因爲呢年幾，保費融資套息差做得好勁，但係大家都知道，呢個套利機會，最大嘅變數就係貸款利息嘅高低，因爲幾乎所有保單質押貸款，都係隨P-Rate或者HIBOR / LIBOR去浮動，如果呢D基準利率上升，就會收窄息差空間，大大影響回報，甚至會有機會蝕本。
而家利率水平已經低無可低，未來The Only way is Up，就肯定大家都有共識。但究竟會加幾多，加幾快？？上星期經濟學人（The Economist）就有一篇文章探討呢個問題。
文章嘅主要論調係，短期而言，利率肯定會升（邊個唔知。。。），主要係因爲多國通脹率上升，例如美國嘅消費者物價指數，已經達到7%，而且已經影響到家庭同企業嘅通脹預期。而美國嘅私人企業人工指數亦按年加左5%。整體而言，環球通脹率已經達到6%嘅水平啦。
為左打擊通脹，各國央行自2021年已經開始加息，其中英倫銀行上年加左一次，今年2月再加多次。市場普遍預期，即使過去十年都無加過息嘅歐洲央行，今年都會加息兩次。而美國，雖然落後，仍然未加過息，但聯儲局已經講明計劃响2024年前，會由而家0-0.25%嘅利息水平加到2%。市場甚至預期，2022年内可能加息1.75%。
呢個係短期嘅息口走勢分析，但係長綫而言，利息水平就唔係由中央銀行話事，而係睇資金市場嘅供求關係。過去二十年，隨住儲蓄同投資失衡，呢個市場利率平衡點越跌越低。一方面，因爲疫情下政府刺激經濟嘅政策，亦因爲近年企業對投資知識產業（IT？）嘅信心，最後亦因爲趨向潔净能源同低碳排放嘅潮流，都使投資需求殷切。
但另一方面，環球人口儲蓄嘅渴望，就更從未停歇。主要係因爲整體人口老化，例如預期到2100年，超過50歲嘅人口比例會由而家嘅25%上升到40%。而年紀大嘅人傾向擁有更多嘅儲蓄，而預期壽命拉長，亦使人需要儲更多錢去應付更長嘅退休生活。
所以，就算資金需求（投資）殷切，但供應（儲蓄）更多，就算短期會加息控制通脹，但長綫而言，利率真係升極有限。呢個睇法，應對保費融資安排上，就係提醒我地，呢兩年要預期息口抽升，如果吹到咩野10年投資期，年回報有20%+（講過啦，根本係呃人）之類，因爲假設利率係最低水平（HIBOR = 0.15%！？），就肯定好快會現形。但如果比客戶一個合理嘅預期，長期利率會升都有限，套息機會，雖然細D空間，應該都仲有機會。
Comments