最近有一篇文章，批評保險從業員協會一篇聲明，果篇聲明主要話“戥啲保險公司唔抵，保費融資出咗問題，好多時好大可能出喺銀行筆槓桿貸款身上”。
而果篇文章就話佢“講呢啲嘢就不知所謂。大佬，成街保險代理都賣緊premium financing，供唔到貸款保單隨時失效，你就話「殃及池魚」將責任賴落銀行到？”
首先，我從來贊成，保險從業員質素好參差，尤其係Sell保費融資上，好多亂噏廿四，之前我好多篇文章都講過呢個情況。但唔代表保險從業員就應該成爲萬一出問題嘅代罪羔羊。我覺得保協嘅論點無錯，而反而果篇批評文章就邏輯上錯得好緊要。
（雖然，批評文章有一點我好贊成，保協呢D行業内維威喂嘅組織，水平好低，我都好唔鍾意佢地。但議事論事，唔係鍾意定唔鍾意，應該要好客觀同有理由。）
要知道，每個人都應該為自己做嘅事負責，每間公司都應該為自己出嘅產品負責，而唔係自己範疇嘅事，無理由要負責，起碼無可能係主要責任。呢一點，保協講得好啱，保單係保險公司嘅產品，而貸款（包括保費融資）係銀行嘅產品。如果保險有問題，或者保險Agent誤導保單内條款，肯定保險公司無得賴賬。
但如果出現“供唔到貸款保單隨時失效” 嘅情況，即係「供款與入息比率」（Debt Servicing Ratio, DSR）同壓力測試做得唔好，呢個點會唔係銀行嘅責任？唔通呢D測試，要保險公司做埋？保險公司審批完客戶還款能力（留意，唔係保費供款能力，係貸款償還能力），然後話比銀行聼可以批准貸款？講出黎都覺得唔通啦。呢個責任，唔係“賴落銀行到“，而根本就應該係銀行嘅責任。
事實上，筆者親身參與過好多保融（當然，筆者無自己跑數好耐，都係睇住下面做Only），事實上保險公司批單時候嘅資產證明，從來做得好嚴格（真係從業做開大單，尤其大陸客錢多但從來證明唔到，就知道呢樣野有幾麻煩）。反而銀行審批，從來Hea做。睇下幾多客去私人銀行做貸款，邊個真係按照金管局規定，有存100萬美金或者Show到其他地方有300萬？
好似經營餐廳一樣，我做餐廳就係要煮得好食、衛生，如果食完肚屙，就緊係拉我。你可以落黎食、可以外賣自取，但如果你選擇揾外賣平台送，如果送得唔好，倒瀉曬、遲大到，你就話我唔好將個責任賴落外賣平台度？會唔會本來就係外賣平台嘅責任？我頂籠係次要責任，因爲唔應該同呢個低質平台合作？所以，厘定各方責任時，要理性D，講理由啊。
Comments