剛剛講過，有篇文章批評保協唔應該“將責任賴落銀行到”，今日再補充下。
果篇文章提到“供唔到貸款“，呢個應該係成件事情嘅問題根源。（討論事情要針對性，既然文章提及呢個情況，我地就針對呢個情況討論，唔好突然又飛去話其他情況其實保險中介都有責任，其他情況，就另外開一個討論，用另外一套邏輯理據。）
所以，我地要有結論，一定要先搞清楚，邊個人做左咩野令到之後客戶“供唔到貸款“。如果係保險中介人做錯野，就當然中介人負責；如果銀行無做野，就當然係銀行責任；如果中介人同銀行都做得好好，只係客戶自己炒濃期指，所以無錢，就好明顯係客戶自己責任。所以，唔可以一出事，就自動話係中介人或者銀行責任，要理性和基於事實！
咁究竟實情係點？有無人中間亂黎？
當然，每個情況都不同，就算中介人同銀行職員，都有人有操守，有人無。我唔係話事情100%係咁，只係提出一個我觀察到都好經常發生嘅情況。
要知道保費融資，係還息唔還本，好似筆者團隊/公司（Broker）從來唔同私人銀行合作，净係老老實實按左張單比零售銀行做融資，就算貸款100萬，之後加息2%都好，一年都係比多2萬，一個月千六蚊之嘛，香港地做得呢D理財操作嘅人，點會供唔起？就算借200萬，咪都係一個月3200囉。又唔係蝕好多（其實計落，就算加1、2厘，都唔使蝕，賺少D之嘛），講真，邊會投訴。
其實出問題嘅，好多係私人銀行，因爲私人銀行係唔單止叫人做保費融資，係會叫你按左層樓，然後買其實係垃圾債券嘅“派息基金”，再用派息基金做Margin，借錢出黎做保融首期，最後先係保費融資。而美其名係派息基金有6、7厘派息，可以覆蓋所有貸款嘅利息。
但係今年，垃圾債券跌左好多，一隻做得好多嘅派息基金，今年6個月已經跌左24%。因爲有做Margin，跌左就要補倉，補唔到，就會比人砍倉，於是令到“保單隨時失效”之餘，甚至連住緊層樓都比銀行收樓。幾百萬可以一夜間唔見曬，所以D客咪投訴lor。
呢個先係“供唔到貸款保單隨時失效”真正背後嘅原因，唔好講到係因爲保險中介人叫D無錢阿婆做保融，所以供唔起。（你估阿婆真係咁容易呃？）
你話，究竟係保險中介人出問題，抑或係銀行出問題？邊個先係講責任賴落對方？
Comments