之前講過，醫療同危疾，二揀一，應該先買醫療，而醫療保險，又分一般同高端，二揀一，應該先買高端醫療，因為可以保到機率細但可能要洗幾百萬果D大病。
而高端醫療唔好嘅地方，唔使講都知道係貴。好彩，市面上都有產品，一方面提供基本醫療項目“全數支付”（我定義高端嘅標準），但另一方面將其他非必須項目降級，於是可以壓低保費，例如40歲，保費可以打低到3,255，甚至平過好多一般醫療。
我叫呢D低端嘅高端醫療。
究竟呢D降級左嘅“非必須項目”包括咩野，真係非必須？
首先，呢個計劃，可以揀一個自付費，即係我地有時候講嘅墊底費。每一年，最初呢個數嘅醫療開支自己俾，以上先係保險公司負責。
我遇過有D客，反射性會話最初5萬無得賠，真係無用。同樣Budget，佢地會走去買無墊底，第一蚊都有得賠果D，於是年年無大件事都總有幾次傷風感冒，Claim返幾次幾百蚊，咪覺得好抵。
但係認真講，第一蚊有得賠，但係樣樣有限額，計返就算遇到大件事，最多都係賠到十零萬，大件事wor，閑閑地都過百啦，點夠？
當然，呢個高端計劃，都可以揀第一蚊都有得賠，貴之嘛。例如標準級別，40歲，無墊底費每年保費港幣9,725，如果加一個5萬墊底，3,255，三倍價錢啊。
所以要知道，你其實係用錢買緊一D條款，如果兩個條款都買，第一蚊都有得賠，大件事過百萬都要有得賠，就俾錢之嘛。如果同一個Budget（一般醫療大部分都同樣係3、4千蚊），咪唯有二揀一，自己衡量。我自己，就肯定話你知買得保險，要針對果D機會細，但災難性嘅風險。
老實講，我自己其實就係買左呢種，小事，頭5萬，自己俾都負擔得起。會唔會有一日折墮到連5萬都俾唔起，講真，5萬之嘛，就算借，一個人十個八個親戚朋友總有啩，一人幾千，籌都籌到啦。
反而，如果一個唔好彩，六合彩又唔見中，有大件事，手術又話幾十萬，標靶藥幾萬蚊粒政府唔包要自費，計落黎成百萬，親戚朋友有心都無力幫啦。
Comentários