top of page

低端嘅高端醫療計劃(三)


之前講到有D低端嘅高端醫療計劃,盡量降低一D非必要嘅項目,黎壓低保費。其中一個就係提供一個墊底費。(賠償頭5萬醫療開支,都可以視爲一個賠償項目。)


除左呢樣,呢個計劃都壓低最高賠償額到最低港幣500萬。之前大多數高端醫療,最高賠償額閑閑地都過千萬,甚至同一間保險公司嘅傳統高端醫療計劃,最高賠償額都成港幣3千萬。高額度自然要高保費。


當然,洗錢呢家野,無話夠唔夠,高級醫院就算一般病房都好豪華,都可以好貴,但老實講,一般人家買醫療,最緊要有得醫,買得起最先進果d 藥,做到最好療程,一年咪最多都係幾百萬,太高額度根本都無必要,浪費。


同一個道理,病房級別都係。傳統高端醫療,叫得高端,基本都一定係單人房。但住醫院,又唔係去Staycation,住咩野房肯定唔係最重要,更重要係“全數賠償”呢個保障。單人房肯定好D,無野㗎,俾錢之嘛,同一個計劃,高兩級就係單人房,40歲爲例,HK$3,255同HK$8,624分別。


仲有一樣,就係保障地域限制。最初,高端醫療一定係全球都可以睇病,頂多分包唔包美國,因爲美國醫療費用真係特別貴。後來,都係成本問題。全球都睇得,講就好聼,但實際上,有幾何真係會飛去外國入院?就算出去睇病,最多咪就亞洲區,所以開始有公司提供净係覆蓋亞洲區嘅版本。


呢個低端嘅高端醫療,甚至去盡D,最平果級,净係包括大中華區。其實好大部分客戶,真係有事,都只不過希望响香港入到私家醫院,用到最先進藥物同療程,根本無諗過要“保外就醫”,所以收窄呢個覆蓋範圍,影響其實有限,但反映响保費上面,就真係好實際。


不過响呢個項目上面,真心都有D爭議。而家成日講,香港要引入祖國專業優秀嘅醫護,如果局留响香港醫,不如真係比多一千蚊,升一級覆蓋亞洲,最重要係包括澳洲同紐西蘭,萬一有事都可以睇返果D被人話黑護,被逼移民左外國嘅醫生,都係求個安心。


總括一句,呢個世界無免費午餐,如果唔睇價錢,緊係保障額越高、保障範圍越廣就越好啦。但如果同一個Budget,或者Budget有限,自然就要响唔同條款之間取捨。而我自己就覺得,最重要嘅項目,就係“全數支付”,其他項目,為左降低保費,無咪算lor。

Comments


bottom of page