早前講過，如果我建議，二選一嘅話，肯定先買醫療保險，因爲危疾保險其實好貴，買一百幾十萬保額都已經係一般家庭嘅負擔極限（尤其幾個家庭成員一人一份），但真係遇上大件事，真係要使好多錢，仲要拖幾年長期戰鬥，一百幾十萬其實真係唔係好多錢。
所以，能夠實報實銷醫療使費嘅醫療險，其實會更應對到呢個最怕萬一嘅風險。
雖然市面上醫療計劃嘅條款五花百門，但我自己會有一個二分法，一類係一般醫療，一類係高端醫療。
一般醫療，我會定義為每項醫療開支都會有一個限額，好似病房就800蚊一日，小手術就5千，複雜手術都係5萬，如果超過限額，就要自己俾。雖然無話總數賠幾多，但睇返實際經驗，其實都係保到十幾廿萬，真係大件事，都只係聊勝於無。
但亦因此，就算呢類一般醫療計劃通常唔會有墊底費，保費都非常經濟。
有好多人，揀呢種嘅原因係因爲第一蚊使費都可以賠，如果包埋門診，就睇次傷風感冒幾百蚊都可以Claim，覺得好實用，但事實上係違背左保險嘅真正意義。買保險，就係為左怕萬一果D要使幾百萬嘅大病，幾百蚊，就自己俾都得，使咩靠保險。（要知道，保費係基於機會率乘賠償額，一定係蝕。）
所以我經常教朋友、客戶，要買，尤其係第一份保健康嘅保障，唔好買危疾，都唔好買呢D一般醫療計劃（就算無墊底第一蚊都有得賠），而係要買一份高端醫療。
當然，行業無一條清晰界綫去分咩野係一般咩野係高端，但我自己有一個準則，如果基本醫療項目，例如住房，醫生費、手術費等等，都係“全額支付”，即係真係之前講果D萬一大病，使幾百萬，都係100%保險公司俾，我就叫高端啦。
全額支付咁好，唔使講都知道，唔好嘅地方當然就係價錢貴。例如一間經常賣廣告話自己好創新果間公司，有一個呢類高端醫療，如果都係第一蚊就開始賠，40歲，都要12,941，比好多一般醫療幾千蚊，貴好多。
所以，我其實欣賞果間法國公司，出左一隻高端醫療，同樣40歲，保費可以打低到3,255，1/4價錢，甚至某程度平過好多一般醫療。
當然，一分錢一分貨，咁平，自然有一D地方係犧牲左，但買保險，最緊要係精鋼用於刀刃上，寧願其他條款差D，但主要嘅醫療項目，可以全數覆蓋，先至係王道。
Comments